Pesoal mediku sira halo swab teste ba komunidade sira iha SIJK, Segunda, 12/7/2021. Imajen Tatoli/Antonio Goncalves.

DILI, 30 jullu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu 49, rekoperadu 46 no kazu ativu 870.

Notísia Relevante: COVID-19, rekoperadu 29 no ativu 867

“Kazu foun ohin 49 hosi Dili 27 no Munisípiu Ermera 13 no Munisípiu seluk hamutuk na’in-sia (9) ne’ebé kompostu hosi mane 26, feto 23,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu imprensa, sesta ne’e.

Hosi totál kazu detetadu foun ohin, ho idade 12 mai kraik na’in-ida (1), idade entre tinan 12-59 na’in-44 (89,7%), idade 60 mai kraik na’in-haat (4), hosi kazu detetadu foun ohin 49 (18,4 %) sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o 30 jullu 2021 hamutuk 10.744. Hosi horisehik mai ohin, teste ne’ebé Laboratóriu Nasionál Saúde halo hamutuk 427 PCR, ho detallu hanesan tuir-mai, vijilánsia sentinela hitu (7), rastreiu ba kontaktu (cntact tracing) 16, rastreiu aleatóriu (random screening) na’in-33, viájen sai-hosi serka sanitária hosi Dili 334, Viájen internasionál lima, follow up iha kuarentena na’in-42.

Totál testes PCR ne’ebé halo horisehik 29 jullu iha Munisípiu-sira seluk, RAEOA no HNGV hamutuk 259 ho detalla hanesan tuir-mai, Maubisse 30, Maliana sia (9), Viqueque 33, Covalima 55, Baucau 35, Ermera ualu (8), RAEOA 21, HNGV 68.

Totál doze vasina ne’ebé fó ona ba populasaun elijível tinan 18 ba leten, to’o ohin dadeer 10h00,  loron 30 jullu tuir sistema informasaun Saúde iha Ministériu Saúde totál kumulativu doze dahuluk iha Dili 136,086 (63,6%), totál  kumulativu doze daruak iha Dili 82,053(38,9%), ema ne’ebé simu ona vasina doze dahuluk iha Timor Leste 285,149 (37,7%) no simu ona doze daruak 95,636 (12,6%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-nain epidemiolojia nian uza mak insidénsia.

Konvensionalmente, insidénsia sukat totál kazu foun kada loron pur mil abitante no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus mak 5,10/100 mil abitante, enkuantu ba de’it Munisípiu ERMERA 30,8/100 mil abitante. Iha semana ida-ne’e, insidénsia iha Munisípiu Dili tu’un ba 4,1/100 mil abitante, tuir kedas ho Munisípiu Viqueque ho valor 5,2/100 mil abitante.

Ida-ne’e hatudu katak Insidénsia Munisipiu Ermera nian maka aas-liu entaun Munisípiu tolu–Ermera, Dili, Viqueque mak iha risku boot liu atu populasaun hetan da’et no hada’et tutan virus SARS-CoV-2 iha komunidade nia le’et.

Evolusaun surtu COVID-19 iha Munisipiu Ermera durante semana ida ikus nia laran. Númeru kazu pozitivu hahú aumenta maka’as iha loron 24 jullu 2021, bainhira relata 36 kazus iha loron ida dei’t.

Ekipa saúde halo rastreiu kontaktu (contact tracing) hahú loron 26 jullu, deteta kazu pozitivu 18 ne’ebé relata iha loron 27 jullu, 123 iha loron 28 jullu, 112 iha loron 29 jullu, no ohin relata kazu pozitivu hamutuk 13.

Rezultadu rastreiu kontaktu ne’ebé halo horisehik, kinta (29 jullu), seidauk hetan hotu rezultadu, no sei relata aban. Ekipa saúde servisu hamutuk ho autoridade administrativa no autoridade komunitária sira, nafatin halo rastreiu kontaktu iha Munisipiu Ermera.

Informasaun hosi izolamentu

Iha 30 jullu 2021, izolamentu Vera Cruz halo tratamentu ba kazu detetadu na’in-15, iha área obstetrisia na’in-hitu (7) no iha medisina interna na’in-haat (4) iha sirurjia na’in-tolu (3), pediatria na’in-ida (1). Iha obstetrisia na’in-hitu (7) kategoria leve (mild ) hotu. Iha área medisina interna na’in-haat (4) leve (mild). Sira na’in-tolu (3) iha sirurjia kategoria leve (mild) hotu no ida (1) iha pediatria kategoria leve.

Númeru kazu moderadu no grave ne’ebé baixa iha Vera Cruz hatudu katak bainhira ema barak liu detetadu pozitivu, barak-liu tan mak sei baixa ho kategoria moderadu no grave.

Informa ba jornalista no públiku tomak katak, ema ne’ebé rekuperadu ona hosi moras COVID-19 no liu ona hosi izolamentu terapéutiku domisiliar (iha uma-rasik) ka iha fatin ne’ebé Estadu prepara, bainhira atu dezloka sai hosi ka tama ba serka sanitária, la presiza halo swab, maibé nafatin presiza hetan autorizasaun esepsionál hosi Diretor CIGC. Atu bele prosesa autorizasaun esepsionál tenke hatudu Sertifikadu Alta hosi Izolamentu, ne’ebé Ministériu Saúde, liuhosi ninia Pilar 7, fo’o ba ema rekuperadu.

Apelu

Apela ba populasaun iha Timor-Leste laran tomak atu tu’ur hakmatek, kumpre ho rigór regra serka sanitária no konfinamentu domisiliáriu ne’ebé Konsellu Ministru deside ona implementa hahú 30 abríl no estende tan ona semana rua ba oin.

Husu atu hotu-hotu kolabora ho autoridade saúde hodi bele buka-tuir ema hotu ne’ebé hetan da’et ona virus ne’e, no izola hosi no labele hada’et-tutan ba ema ne’ebé seidauk hetan da’et.

Ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira-ne’e mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista : Felicidade Ximenes

Editór       : Cancio Ximenes

HAKEREK NO HATÁN

Please enter your comment!
Please enter your name here