Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (28/07). Imajen TATOLI/Egas Cristóvão

DILI, 28 jullu 2021 (TATOLI)Governu liuhosi reuniaun Konsellu Ministru (KM) deside hodi impoin hikas serka sanitária iha munisípiu Ermera, hahú tuku 00:00 loron 29 jullu 2021 to’o tuku 23:59 loron 12 agostu 2021.

“Razaun impoin serka sanitária iha Ermera tanba tuir informasaun ne’ebé Konsellu Ministru simu, númeru infesaun derepende de’it sa’e maka’as, to’o kuarta ne’e númeru infesaun foun 123, tanba ne’e, Sala Situasaun, Sentru Integradu Jestaun Krize (CICG, sigla portugés) husu Konsellu Ministru aprova ba munisípiu ne’e,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.

Aleinde ne’e, KM delibera Projetu Rezolusaun Governu hodi mantein impozisaun serka sanitária iha munisípiu Dili to’o tuku 23:59 loron 12 agostu 2021.

Desizaun ne’e, Governu deside hafoin analiza aprezentasaun pontu situasaun epidemiolójika nasionál, hosi CIGC.

“Serka sanitária ne’e la’ós konfinamentu obrigatóriu ne’ebé taka totál katak bandu labele sai, maibé tenke kumpre regra saúde noizola munisípiu de’it,” Portavóz Governu esplika.

Nune’e, bandu sirkulasaun ema sira-nia entre munisípiu Dili no Ermera no sirkunskrisaun administrativa sira-seluk, exetu iha kazu hirak ne’ebé ho fundamentu forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku.

“Proibisaun sirkulasaun ne’e la inklui indivíduu sira ne’ebé komprova vasinasaun kompleta ka doze rua kontra COVID-19, no mós ba labarik sira ho idade tinan 6 mai kraik ne’ebé akompaña,” nia akresenta.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here