Prezidente Konsellu Diretivu TATOLI, I.P, Manuel Pinto. Imajen Tatoli/Egas Cristóvão.

DILI, 30 jullu 2021 (TATOLI)—“Olhar o pasado, atuar no presente e projetar o futuro”, tema ne’e sai pontu partida ida atu halo reflesaun iha selebrasaun aniversáriu Tatoli-Agência Noticiosa de Timor-Leste,I.P ba da-lima. 

“Basá ami konsiente katak, fatór determinante ba futuru depende ba saida mak ami halo ona iha loron ohin-nian,” Prezidente Tatoli,I.P, Manuel Pinto, hateten iha diskursu kolókiu ho tema ‘Papél Tatoli,I.P ba susesu eleisaun Prezidensiál iha tinan 2022’, ne’ebé hala’o iha edifísiu atuál Faról, Dili, sesta ne’e.

Notísia relevante:Perante eleisaun jerál, Tatoli,I.P tenke sai portavós umanístika

Tema ne’e bazeia ba reflesaun katak, Tatoli,I.P nia pasadu mak sai abut atu apreende. Susar, terus no dezafiu oin-oin ne’ebé hasoru iha pasadu, la sai obstáklu atu hakat, tanba Tatoli,I.P iha vizaun, misaun no objetivu ida klara. Pasadu ne’ebé hakonu ho dezafiu nu’udár lisaun ida de’it tanba atu hetan futuru ida nabilan, presiza serbisu makás no hatene agradese ba buat hirak-ne’ebé hetan ona.

Nia hatutan, dezenvolvimentu instituisaun Tatoli,I.P dinamikamente la sees dook hosi dezenvolvimentu Estadu direitu demokrátiku TL.

Inisiativa harii Agência noticiosa TL, mai kedan iha tempu luta kontra okupasaun Indonézia iha Timor-Leste.

Momentu ne’ebá fundadór nasaun, hanesan José Ramos Horta ho nia-maluk sira harii “East timor news agency” ou ho naran badak ETNA nu’udár meiu komunikasaun doutrinadu hodi fó-sai informasaun kona-bá atividade polítika, iha kontestu luta kontra invazaun.

“Ba inisiativa murak ida-ne’e, ha’u lori jornalista timor-oan tomak nia-naran, espesialmente jornalista Tatoli,I.P no funsionáriu tomak, hato’o agradese wa’in ba vizaun ne’e no ohin ami jerasaun foun hetan oportunidade atu serbí ba rai ida-ne’e liuhosi informasaun iha instituisaun ne’e,” Manuel Pinto, agradese.

Atuál líder másimu Tatoli,I.P ne’e mós agradese ba Nélio Isaac Sarmento, ne’ebé ho kapasidade no vizaun, bainhira asume kargu hanesan Sekretáriu Estadu Komunikasaun Sosiál iha IV Governu Konstitusionál, hamosu kedan inisiativa hodi prodús Lei númeru 5/2014, loron 19 novembru, ‘Lei komunikasaun Sosial’ nu’udár baze fundamentál ida hodi restaura ETNA sai hanesan embriaun Agência Noticiosa de Timor-Leste, ho naran badak ‘ANTIL’, liuhosi dezisaun Konsellu Ministru iha 03 fevereiru 2016.

Nia hatutan, hafoin ida-ne’e, eis Primeiru Ministru Rui Maria de Araújo, iha 27 jullu 2016, iha Otél Novo Turizmu, Dili lansa embriaun ANTIL iha Timor-Leste. Hanesan hakerek nanis ona iha lei komunikasaun sosiál kapítulu V (Orgaun no meiu komunikasaun sosiál, alinea 4, hateten katak, ‘Sidadaun no Estadu livre atu harii agência notísia nian hodi habelar informasaun iha nível nasionál no internasionál’.

“Iha biban ida-ne’e hamutuk ho ha’u nia-maluk Rafael Ximenes Belo, Rita Almeida, Xisto Freitas, Maria Auxiladora Freitas, Zezito da Silva no Júlia Chatarina, hetan fiar nu’udár jornalista estajiáriu ANTIL hodi asume responsabilidade atu garante no dinamiza funsionamentu redasaun ANTIL durante periúdu preparasaun ba transformasaun ANTIL nakfila ba Tatoli, I.P,” nia subliña.

Nune’e, nia dehan, iha tinan 2017 Konsellu Ministru aprova dekretu lei númeru 21/2017, 24 maiu, hodi konsidera kriasaun ANTIL bazeia ba rezolusaun Governu númeru 9/2016 ofisialmente sai hanesan Agência noticiosa Timor-Leste ho nia-estatutu rasik nu’udár instituisaun públika ka I.P.

Tatoli, I.P estabelese ho objetivu sai fonte informasaun ofisiál Estadu TL ne’ebé la’ós de’it fó-sai informasaun, maibé mós asume papél nu’udár “National Information Clearing House”, hodi halakon misinformasaun, dizinformasaun no malinformasaun ne’ebé sirkula iha públiku.

Partisipa iha iha serimónia ne’e mak hanesan, Laureadu Nobel ba Pás José Ramos Horta, Ministru Asuntu Parlamentár no Komunikasaun Sosiál (MAPKOMS),  Francisco Martins da Costa Pereira Jerónimo, Sekretáriu Estadu Komunikasaun Sosiál (SEKOMS), Merício Juvinál dos Reis Akara, Prezidente Comissão Nasionál das Eleições (CNE), Alcino de Araujo Barris, Diretór Jerál Sekretariadu Tékniku  Administrasaun Eleitorál (STAE), Acilino Manuel Branco, Prezidente Conselho Imprensa (CI), Virgílio Guterrres, reprezentante Partidu Polítiku hosi Partidu Libertasaun Populár (PLP), Demétrio de Carvalho Amaral, reprezentante Partidu Polítiku hosi Partidu Demokrátiku (PD), Nino Pereira, diretór Komisaun Justisa no Pás Arkedioseze Dili, Padre Demétrio da Conceição Xavier, korpu diplomátiku, parseiru no konvidadu sira-seluk.

Tatoli,I.P mós konvida reprezentante Partidu Polítiku hosi Partidu Congresso Nacional Reconstrução Timorense (CNRT), ho Frente Revolucionário Timor Leste Independente (FRETILIN), maibé la disponível tanba okupadu ho serbisu.

Notísia relevante:Kolókiu, ‘Papél Tatoli,I.P ba susesu eleisaun Prezidensiál 2022’

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here