Médiku-sira kontinua hala’o teste swab ba komunidade iha Sentru Integradu Jestaun Kriza (SIJK) tersa, (27/07/21). Imajen Tatoli/António Gonçalves.

OÉ-CUSSE, 30 Jullu 2021 (TATOLI)—Autoridade Rejiaun Administrativa Espsiál Oé-Cusse Ambeno (RAEOA) aplika konfinamentu domisliáriu semana-rua hahú 30 jullu to’o 12 agostu ba komunidade Suku Naimeco, Sub-Rejiaun Pante Makasar hafoin servisu saúde deteta kazu positivu tolu (3) iha sentru saúde Bakui.

Notísia Relevante: Autoridade RAEOA: Oé-Cusse tenke livre hosi COVID-19

“Situasaun iha Naimeco lockdown totál, tanba ekipa saúde deteta kazu pozitivu tolu (3) iha sentru saúde Baqui. Seidauk iha transmisaun komunitária maibé ita tenke prevene,” Sekretáriu Rejionál Asuntu Saúde, Manuel da Costa, informa ba Ajensia Tatoli liuhosi telefónika, sesta ne’e.

Dirijente ne’e hateten, atu evita transmisaun komunitária ekipa liña frente sira hahú identifika ona mapamentu hodi destaka seguransa sira atu labele fó autorizasaun ba movimentu ema ho transporta maibé ema ruma atu tama mai tenke halo teste swab, no populasaun iha suku laran m’os tenke teste swab obrigatóriu.

“Ita-nia kazu positivu COVID-19 iha Oé-Cusse hamutuk ema-na’in haat (4) no sira kumpre hela iha izolamentu kliníka Coração,” nia dehan.

Xefe Suku Naimeco, Marcos Liu Abi, hateten nu’udár autoridade lokál nkia parte fó apoiu tomak ba servisu Estadu nian no prontu kolabora atu kombate moras COVID-19 iha Oé-Cusse

“Agora, ha’u nia suku taka totál durante semana rua (2). Ha’u hanesan autoridade lokál tenke apoiu tanba ne’e servisu Estadu nian,” nia hateten.

Tanba ne’e, nia apela ba komunidade suku Naimeco no en-jeral populasaun sira iha Oé-Cusse tomak labele halo vizita iha suku refere, no ekipa liña frente sira hamutuk ho PNTL hahú halo srguransa haleu suku laran atu evita komunidade nia movimentu.

Entretantu totál populasaun iha suku Naimeco hamutuk 5,358 kompostu hosi aldeia Bonemese 963, aldeia Baqui 1981, aldeia Noque 1547, aldeia Teina’e 867

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here