DILI, 29 jullu 2021 (TATOLI)—Polísia Nasionál Timor-Leste (PNTL), identifika ema na’in-haat ne’ebé deskonfia envolve iha kazu sunu uma tolu iha aldeia Samelau, suku Ritabou, postu administrativu Maliana, munisípiu Bobonaro.
“PNTL munisípiu Bobonaro halo hela identifikasaun ba uma ne’ebé ahí han. Bolu ona ema na’in-haat hodi halo identifikasaun, maibé seidauk identifika autór prinsipál,” Portavóz Komandu Jerál PNTL, Superintendente Xefe, Arnaldo de Araújo, hateten ba jornalista-sira liuhosi konferénsia imprensa iha komandu jerál PNTL, Caicoli, kinta ne’e.
Notísia relevante:PNTL kontinua buka ema deskoñesidu sunu uma tolu iha Ritabou
Kona-bá motivu hosi akontesimentu ne’e, sei iha prosesu investigasaun no parte polísia kontinua halibur dadus inklui buka-tuir autór prinsipál.
Ema deskoñesidu sunu uma hirak-ne’e, iha sábadu (24/07) tuku 13:50 no domingu (25/07), maibé parte seguransa to’o kedan iha fatin hodi komunika ba parte Bombeiru atu halo intervensaun ne’ebé konsege salva de’it uma ida.
Jornalista: Nelson de Sousa
Editór: Cipriano Colo