iklan

BOBONARO, MUNISÍPIU

PNTL kontinua buka ema deskoñesidu sunu uma tolu iha Ritabou

PNTL kontinua buka ema deskoñesidu sunu uma tolu iha Ritabou

Ema deskoñesidu sunu uma-tolu, iha aldeia Samelau, suku Ritabou, postu administrativu Maliana, munisípiu Bobonaro, sábadu (24/07). Imajen Tatoli/Sérgio da Cruz.

BOBONARO, 27 jullu 2021 (TATOLI)—Polísia Nasionál Timor-Leste (PNTL), munisípiu Bobonaro, kontinua buka autor prinsipál hosi grupu deskoñesidu ne’ebé sunu uma iha aldeia Samelau, suku Ritabou, postu administtativu Maliana, munisípiu Bobonaro.

“Operasaun kontinua la’o hodi orienta Task Force atu buka-tuir autór deskoñesidu ne’ebé sunu uma ne’e,” Komandante PNTL, munisipiu Bobonaro, Superintendente Antoninho Mau-Luta hateten iha komandu PNTL Bobonaro, tersa ne’e.

Notísia relevante:Grupu deskoñesidu sunu uma rua iha suku Ritabou

Asaun sunu uma ida ne’e akontese iha sábadu (24/07) tuku 13:50 otl no kontinua sunu tán uma ida iha sábadu kalan no domingu (25/07) kalan sunu tan uma ida, nafatin iha aldeia Samelau.

Alende ne’e, ema deskoñesidu ne’ebé sunu uma hirak-ne’e mós uza rama hodi hana mate komunidade nia bibi, inklui estraga sasan.

Tanbe ne’e, Komandante Mau-Luta orienta ona membru-sira atu halo seguransa másimu iha suku Ritabou, nune’e bele garante seguransa ba komunidade.

Hosi akontesimentu ne’e, ekipa konjunta PNTL konsege detein ema na’in-sia, hodi ba halo ona identifikasaun iha Komandu PNTL munisípiu Bobonaro, tanba deskonfia involve iha kazu sunu uma ne’e.

Nia mós informa katak, durante loron rua ne’e, membru PNTL detekta hela  grupu hosi fatin seluk mai konsentra iha Maliana laran, no Komandu sei orienta membru-sira atu foti hotu hodi lori ba halo identifikasaun, nune’e bele hatene motivu konsentrasaun ne’e.

Komandante ne’e mós husu ba vítima-sira atu hato’o deklarasaun iha Komandu PNTL Bobonaro, nune’e fasilita prosesu investigasaun bele la’o di’ak liu.

Husu mós ba vítima no sasin-sira atu koopera ho seguransa, hodi fó informasaun klara, nune’e  hafásil serbisu polísia bele detekta lalais paradeiru grupu deskoñesidu ne’e.

Jornalista: Sérgio da Cruz

Editór: Cipriano Colo

iklan
iklan

Leave a Reply

iklan
error: Content is protected !!