Ekipa konjunta PNTL, lidera hosi Portavós Komandu Jerál, Superintendente Xefe, Arnaldo de Araújo, akompaña FAP ne’ebé deskonfia sunu uma iha eis merkadu Comoro, hala’o konferénsia imprensa, iha komandu jerál, Caikoli, kinta (29/07/21). Imajen Tatoli/Nelson de Sousa.

DILI, 29 jullu 2021 (TATOLI)—Polisía Nasionál Timor-Leste (PNTL), detein ona suspeitu ho inisiál FAP ne’ebé deskonfia sunu uma iha eis merkadu Comoro, aldeia 02, suku Fatuhada, postu administrativu Dom Aleixo, munisípiu Dili, kinta (29/07) tuku 3:00 madrugada.

Kronolojia detensaun ne’e, bainhira inséndiu akonteste, Serbisu Investigasaun Kriminál Nasionál, serbisu konjuntu ho komandu polísia munisípiu Dili liuhosi eskuadra Dom Aleixo, duni-tuir kedan suspeitu no iha tuku 5:00 otl, ekipa identifika tán suspeitu komete aktu ba krime harahun vidru iha rezidénsia korpu diplomátiku Nova Zelándia no Austrália iha Praia dos Coqueiros.

Notísia relevante:PM manifesta solidariedade ba vítima afetadu inséndiu eis merkadu Comoro

Nune’e, imediatamente kaptura kedan suspeitu iha fatin, hodi transporta ba edifísiu investigasaun kriminál nasionál.

“Suspeitu detein hela iha sela polísia, hodi aprezenta ba primeiru interrogatóriu iha Tribunál Distritál Dili antes oras 72,” Portavós Komandu Jerál  PNTL, Superintendente Xefe, Arnaldo de Araújo, hateten ba jornalista-sira liuhosi konferénsia imprensa, iha komandu jerál PNTL, Caikoli, kinta ne’e.

Arnaldo Araújo  la esplika detalla kona-bá kronolojia ahi-han uma maibé, iha identifikasaun suspeitu komete krime iha konkursu iha artigu 35, krime inséndiu 263 no danu agravadu 259 hotu-hotu iha kódigu penál.

Investigadór prepara ona auto-notísia flagrante delitu ho númeru Nuc 0397/21DICMR.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here