Komunidade afetadu inséndiu iha eis Merkadu Comoro buka hela sasán sira ne’ebé bele salva, kinta (29/07). Imajen TATOLI/António Gonçalves

DILI, 29 jullu 2021 (TATOLI)–Primeiru-Ministru (PM), Taur Matan Ruak, manifesta solidariedade ba vítima inséndiu iha eis Merkadu Comoro, postu administrativu Don Aleixo, munisípiu Dili.

Xefe Governu espresa nia laran triste bainhira rona notísia kona-ba akontesimentu inséndiu ne’ebé akontese iha kinta (29/07) madrugada maizumenus tuku 03:00 liu, ne’ebé afeta uma barak mak ahi han mutuk hotu.

“Dadeer ne’e, ha’u rona rekadu kona-ba inséndiu iha eis Merkadu Comoro, ne’ebé kuaze atinje uma komunidade hamutuk 400-resin mak ahi han hotu, ha’u-nia laran  triste no lamenta tebes rona notísia ida ne’e,” Xefe Ezekutivu hato’o sentimentu triste liuhosi nota ne’ebé Agência TATOLI asesu, kinta ne’e.

Ho situasaun ne’e, PM orienta ona ba ministériu relevante sira hanesan Ministériu Solidariedade Sosiál no Inkluzaun (MSSI), Ministériu Administrasaun Estatál (MAE) no Sekretaria Estadu Protesaun Sivil (SEPS) atu halo intervensaun imediata atu fó apoiu ba família afetadu.

“Ha’u orienta ona ministériu relevante atu tun imediata ba terrenu hodi halo identifikasaun no intervensaun apoiu emerjénsia ruma ba ita-nia família ne’ebé afetadu,” nia subliña.

Nune’e, hodi PM nia naran rasik no Governu, manifesta solidariedade ba família sira ne’ebé afetadu no husu atu korajen iha situasaun ida-ne’e.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here