Bee-moos. Imajen/Espesiál

DILI, 28 jullu 2021 (TATOLI)—Governu liuhosi reuniaun Konsellu Ministru (KM) aprova ho alterasaun projetu deliberasaun kona-ba selebrasaun akordu Timor-Leste no Banku Dezenvolvimentu Aziátiku (ADB, sigla ingles) finansiamentu no kontribuisaun finanseira.

“Akordu rua ne’e ba projetu dezenvolvimentu infraestrutura bee no saneamentu ne’ebé lokaliza iha Viqueque, Lautém no Same,” Ministru Prezidénsia Konsellu Ministru, Fidelis Manuel Leite Magalhãe, relata hafoin reuniaun ezekutivu iha Palásiu Governu, kuarta ne’e.

Tanba ne’e, KM fó podér tomak ba Ministru Finansa, Rui Agusto Gomes, hodi reprezenta Estadu Timor-Leste atu asina akordu ne’e.

Notísia relevante: BTL,E.P finaliza ona planu mestre bee no saneamentu munisípiu neen

Antes ne’e, Bee Timor-Leste, Empreza Públika (BTL,E.P) finaliza ona planu mestre bee no saneamentu ba munisípiu munisípu neen hanesan Dili, Baucau, Lautém, Same, Viqueque, Manatuto inklui Rejiaun Administratativa Espesiál Oé-cusse Ambeno (RAEOA).

Iha prosesu negosiasaun, ADB prontu atu finansia projetu liuhosi empréstimu ho kustu orsamentu millaun $47 no Governu prevee millaun $13 ho totál millaun $60 hodi lansa projetu konstrusaun.

Iha loron 22 marsu 2016, Timor-Leste ofisialmente lansa planu mestre bee no saneamentu munisípiu Baucau, Lautém, Viqueque no Manufahi.

Tuir polítika VIII Governu Konstitusionál katak planu mestre sai save ba dezenvolvimentu estratéjiku ne’ebé sei la’o to’o tinan 2030, atubele atinje meta ne’ebé hatudu populasaun sira hetan ona asesu bee-moos no  saneamentu ho di’ak.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here