BTL, E.P fornese bee-moos ba komunidade ne’ebé hetan impaktu sistema distribuisaun bee a’at tanba dezastre naturál. Imajen/BTL,E.P

DILI, 10 maiu 2021 (TATOLI)-Governu liuhosi Bee Timor-Leste, Empreza Públika (BTL,E.P) finaliza ona planu mestre bee no saneamentu ba munisípiu neen iha Timor-Leste.

“Ita finaliza ona planu mestre iha  munisípu neen hanesan Dili, Baucau, Lautém, Same, Viqueque,  Manatuto inklui Rejiaun Administratativa Espesiál Oé-cusse Ambeno (RAEOA),” Prezidente Konsellu Administrasaun BTL,E.P, Carlos Peloi dos Reis, hateten iha salaun Hotel Novo Turismo, Lecidere, Dili, segunda ne’e.

Maski nune’e, iha Manatuto no RAEOA nia projetu integradu kompletu ona no agora BTL foku ba operasaun no manutesaun de’it iha munisípiu Baucau, Viqueque, Lautém no Same, ne’ebé iha prosesu dezeñu detalladu atu lori ba faze konstrusaun.

Tuir nia, planu mestre munisípiu Baucau hetan finansiamentu hosi empréstimu Banku Mundiál  millaun $27 no Governu mós prevee millaun $3 atu kompleta millaun $30 hodi halo konstrusaun sistema bee-moos no sanemanentu iha munisípiu refere.

“Ita asina ona akordu ho Banku Mundiál maibé falta efetividade mak seidauk, tanba ne’e espera iha fulan oin ami bele kompleta ona gráfika ezbosu dezeñu detalladu atubele komesa prosesu akizisaun,” nia akresenta.

Enkuantu, ba munisípiu Same, Lautém no Viqueque,  iha ona prosesu negosiasaun ho Banku Dezenvolvimentu Aziátiku (ADB, sigla inglés), ne’ebé prontu atu finansia projetu liuhosi empréstimu ho kustu orsamentu millaun $47 no Governu mós prevee milaun $13 ho totál millaun $60 hodi lansa projetu konstrusaun.

Prezidente BTL dehan, negosiasaun  ne’e bele to’o konkluzaun iha tempu badak tanba iha ona konkordánsia entre ADB no Governu.

“Ita espera fulan jullu hanesan ne’e sira-nia jerente ADB konkorda no selebra akordu, ita espera katak iha tinan oin ita bele lansa projetu konstrusaun iha munisípiu haat ne’e,” nia hatutan.

Aleinde ne’e, iha munisípiu Ainaro, Suai, Ainaro, Maliana, Aileu no Ermera no Liquiçá, konsultór sira hahú halo ona estudu viabilidade no planu mestre.

“Ita iha estudu viabilidade hosi empreza portugál no kompañia lokál, ne’ebé espera tinan ne’e estudu bele ramata, nune’e iha tinan oin ita bele lansa dezeñu detalladu,” nia subliña.

Iha loron 22 marsu 2016, Timor-Leste ofisialmente lansa planu mestre bee no saneamentu munisípiu haat nian hanesan Baucau, Lautém, Viqueque no Manufahi.

Tuir polítika VIII Governu Konstitusionál katak planu mestre sai save ba dezenvolvimentu estratéjiku ne’ebé sei la’o to’o tinan 2030, atubele atinje meta ne’ebé hatudu populasaun sira hetan ona asesu bee-moos no  saneamentu ho di’ak.

Iha Programa Monitorizasaun Konjunta iha tinan 2015, ne’ebé avalia meta no objetivu dezenvolvimentu, Timor-Leste la atinje kompromisu kona-ba bee no saneamentu, ne’ebé haree hosi kazu espesífiku abastesimentu bee tuir objetivu nasionál atu garante 75% populasaun asesu ba bee ne’ebé adekuadu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here