Prosesu funerál ba saudozu Gaspar Guterres da Silva ‘Mafo Maleo’ iha semitériu Herois da Pátria Ossu, suku Osorua, kuarta, (28/07/21). Imajen Tatoli/Vitorino Lopes da Costa.

VIQUEQUE, 28 jullu 2021 (TATOLI)—Saudozu Gaspar Guterres da Silva ho kódigu ‘Mafo Maleo’ hakotu-iis iha rezidénsia, aldeia Buanurak, suku Osorua, postu adiministrativu Ossu, Munisípiu Viqueque, iha domingu 25 jullu 2021, tanba sofre moras komplikadu.

Iha kronolojia moras ne’ebé família deskreve katak, saudozu hahú sofre moras komplikadu desde 2012, durante tinan 11 família esforsu hodi lori ba halo tratamentu saúde iha Ospitál no klínika-sira maibé la konsege salva.

Notísia relevante:Xanana Gusmão presta omenajen ba saudozu “Dusae”

Mafo-Maleo nu’udár oan primeiru, moris iha suku ossorua rai-mutin, postu administrativu Ossu iha 08 abríl 1964, hosi aman Labo-Olo no Elvina Freitas, iha alin feto na’in-ida.

Saudozu hahú estudu iha eskola primária Dalirisi iha 1969 no la konsege remata, tanba edifísiu eskola hetan sunu, no foin kontinua estudu kuarta klase iha Loihuno iha 1972.

Mafo-Maleo hahú partisipa luta libertasaun nasionál, hanesan militante FRETILIN iha 01 marsu 1976 to’o 28 fevereiru 1977, sai mós hanesan komandante pelotaun defeza ne’ebé responsabiliza hosi komandante Zeca.

Hahú 01 marsu 1977 to’o 31 dezembru 1978, saudozu hanesan soldadu hosi setór F lideradu hosi komadante Kilik.

Iha levantamenu 1983, saudozu Gaspar Guterres da Silva, destera ba illa Ataúro hamutuk ho Elias, Mariano Mauloy, Miguel Piedade no seluk tán to’o 1987.

Iha 1985, saudozu kaben ho Florentina do Rosário, no hosi kazamentu ne’e iha oan na’in-lima.

Bainhira fila hosi Ataúro iha 1987, saudozu kontinua envolve iha frente klandestina kaixa Fitun Timur, ne’ebé responsável maka Plácido da Silva ‘Maula’ no iha O1  janeiru 1993 saudozu kontinua firme iha klandestina Fitun Timur to’o 14 setembru 1998, hanesan seksaun lojístika abas CNRM/CNRT ho responsável maka Manuel Soares.

Iha 15 setembru 1998, hanesan segundu Vise Selkom to’o 30 agostu 1999 no iha era indepedénsia hahú  hosi 2003 to’o 2008, saudozu hanesan segundu vise komisaun organizadora partidu FRETILIN iha aldeia Gomiuro, suco Macadique, postu adminstrativu Uatolari.

Iha serimónia funerál, administradór postu administrativu Ossu, Agustinho de Sousa, rekoñese kontribuisaun saudozu ba prosesu ukun rasik-an ho moto ‘ita moris ho vitória no mate ho istória’.

“Ita hotu-hotu nu’udár timoroan fó valór no omenajen ba as’wa’in-sira, tanba sakrifika-an ba independénsia rai ne’e,” Agustinho de Sousa, hateten iha semitériu Herois da Pátria Ossu, suku Osorua, kuarta ne’e.

Reprezentante família, Juvin Frankin, husu Governu atu tau matan ba oan ki’ak-sira ho inan fuluk, tanba durante ne’e saudozu mós fó kontribuisaun ba rai ida-ne’e, liuliu hetan torturasaun hosi militár Indonézia to’o sofre moras grave.

Kona-bá ne’e, reprezentante Konsellu Nasionál Veteranu munisípiu Viqueque, Manuel Gomes da Silva promete katak, sei serbisu hamutuk ho autoridade lokál atu rezolve direitu veteranu hosi saudozu labele lakon.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here