Kay Rala Xanana Gusmão, presta omenajen ba Eduardo de Deus Barreto “Dusae”. Imajen/Espesiál.

DILI, 27 maiu 2021 (TATOLI)—Prezidente Partidu Congresso Nacional de Reconstrução de Timorense (CNRT), Kay Rala Xanana Gusmão, presta omenajen ba Eduardo de Deus Barreto “Dusae”.

Notísia Relevante: Saudozu “Dusae” lori Xanana Gusmão fiar povu Ermera nia luta

“Bainhira ita hasoru malu iha Ermera, ita hamutuk kria zona gerilla foun ida, hodi ita-nia forsa bele ba to’o iha-ne’ebá maibé tanbasá ó husik tiha ami Dusae. Vida kala hanesan ne’e duni. Ó uluk tiha ona ami sei tuir ó,” Xanana Gusmão presta omenajen ikus ba saudozu Dusae nia mate-isin iha sede partidu CNRT, Bairro dos Grilhos, Dili, kinta ne’e.

Eis Prezidente Repúblika ne’e husu ba saudozu Eduardo de Deus Barreto ‘Dusae’ atu tulun povu nia susar iha situasaun atuál ne’e.

“Kumpre nafatin ó-nia devér hanesan kuadru CNRT, harohan ba maromak, hodi ita bele hetan konfiansa nafatin no kbiit atu hatuur fila-fali Estadu direitu demokrátiku ne’e,” Xanana Gusmão hameno.

Eis Primeiru Ministru ne’e ho tanis, husu ba saudozu Dusae atu tau matan nafatin ba povu iha rai ida-ne’e, ne’ebé dezde uluk kedas fó isin-lolon, hanoin no kosar been maibé triste tanba Dusae husik derrepente de’it.

Prezidente Partidu CNRT ne’e rekuñese la vizita Dusae tanba propagasaun surtu COVID-19 mak impede.

Hosi sede partidu CNRT, mate-isin lori kedas ba Parlamentu Nasionál, atu bele presta omenajen ikus. Sai hosi Parlamentu Nasionál mate-isin sei ba hatuur iha Tasi Tolu, Dili.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here