Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (28/07). Imajen TATOLI/Egas Cristóvão

DILI, 28 jullu 2021 (TATOLI)–Governu liuhosi Konsellu Ministru (KM) aprova Dekretu Governu kona-ba medida ezekusaun deklarasaun Estadu Emerjénsia (EE) ba dala-XVI, ne’ebé efetua hosi Prezidente Repúblika númeru 56/2021 loron 27 jullu, hodi hatán ba pandemia COVID-19.

EE ne’ebé renova ona, abranje ba territóriu nasionál tomak no vigora entre tuku 00:00 loron 01 agostu 2021 to’o tuku 23:59 loron 30 agostu 2021.

“Mantein medida ezekusaun deklarasaun Estadu Emerjénsia anteriór, liuliu obriga sidadaun sira hotu ne’ebé hela iha Timor-Leste atu mantein distánsia pelumenus metru ida ho ema seluk, ne’ebé la hela iha ekonomia komun,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.

Notísia relevante: EE XV: tama Timor-Leste tenke aprezenta teste COVID-19 negativu

Aleinde ne’e, kontinua obriga utiliza máskara oin, ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza no fase liman bainhira hakarak tama ba estabelesimentu komersiál sira, industriál ka prestasaun servisu sira ka ba edifísiu sira ne’ebé servisu administrasaun públika nia funsiona.

“Ema hotu nafatin iha obrigasaun atu evita formasaun halibur malu iha dalan públiku,” Portavóz Governu akresenta.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here