Primeiru-Ministru, Taur Matan Ruak, prezide reuniaun estraordinária Konsellu Ministru, iha Palásiu Governu, kinta (01/07). Imajen TATOLI/Francisco Sony

DILI, 01 jullu 2021 (TATOLI)—Governu liuhosi reuniaun Konsellu Ministru (KM), aprova ona Projetu Dekretu Governu kona-ba medida ezekusaun ba deklarasaun Estadu Emerjénsia (EE) ba dala-XV, hosi Dekretu Prezidente Repúblika númeru 39/2021, loron 30 juñu hodi hatán ba pandemia COVID-19.

“Governu determina ona katak ema hotu ne’ebé hakarak tama iha Timor-Leste tenke aprezenta komprovativu rezultadu negativu teste detesaun SARS-CoV-2 ka COVID-19, ho antiguidade la liu loron-lima,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, kuarta ne’e.

Notísia relevante: Governu propoin Xefe Estadu renova Estadu Emerjénsia ba dala-XV

Tuir Ministru, desizaun ne’e ezekutivu sira foti hafoin análiza aprezentasaun pontu situasaun epidemiolójika país hosi Sala Situasaun, Sentru Integradu Jestaun Krize (CIGC, sigla portugés).

 EE ba dala-XV abranje ba territóriu nasionál tomak no vigora hosi tuku 00:00 loron 02 jullu to’o tuku 23:59 loron 31 jullu 2021.

Medida ezekusaun períodu ne’e, sé maka simu vasina kompleta no mai ka liuhosi país sira ne’ebé identifika ona variante Delta SARS-CoV-2, (variante vírus foun), tenke kumpre kuarentena loron-lima, enkuantu sé maka la simu vasina kompleta kontinua kumpre kuarentena loron 14.

“Inisiativa ne’e ho objetivu atu kombate falsifikasaun dokumentu komprovativu vasina kompleta no Governu haruka ona Ministra Saúde hodi aprova modelu ofisiál ida hosi dokumentu komprovativu vasinasaun,” Portavós Governu akresenta.

Enkuantu, regra sira seluk mantein nafatin sidadaun sira hotu ne’ebé hela iha Timor-Leste, atu mantein regra distánsia pelumenus metru ida ho ema seluk ne’ebé la hela iha ekonomia komun.

Nune’e mós, kontinua obriga utiliza máskara ne’ebé taka inus no ibun, bainhira hakarak tama ka hela iha fatin públiku ka privadu hirak ne’ebé ema hotu uza.

Fase liman bainhira hakarak tama ba estabelesimentu komersiál, industriál, prestasaun servisu ka ba edifísiu servisu administrasaun públika, no evita formasaun halibur-malu iha dalan públiku.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here