Konsuladu TL-Kupang, Sezuinho dos Reis Matos Carvalho, hala’o enkontru ho komandante Unidade Patrullamentu Fronteira (UPF), Euclides Belo, iha postu integradu Batugade, kuarta (28/07/21). Imajen Tatoli/Sérgio da Cruz.

BOBONARO, 28 jullu 2021 (TATOLI)—Konsuladu Timor-Leste (TL) iha Kupang Indonézia, koordena ona ho autoridade seguransa Indonézia, atu lori-fila Timoroan ne’ebé hakat liu ona fronteira ilegalmente no oras-ne’e iha hela Atambua.

“Ami koordena ona ho autoridade Indonézia iha Atambua atu bele lori fila ita-nia sidadaun-sira ne’e  entrega mai ami, nune’e ita halo deportasaun,” Konsuladu TL-Kupang, Sezuinho dos Reis Matos Carvalho, hateten ba jornalista-sira, hafoin enkontru ho komandante Unidade Patrullamentu Fronteira (UPF), Euclides Belo, iha postu integradu Batugade.

Notísia relevante:Serbisu Imigrasaun investiga Timoroan na’in 14 hakat ilegál ba Indonézia

Konsuladu ne’e mós husu ba Timor-sira ne’ebé oras-ne’e iha hela Atambua, atu organiza malu koopera ho autoridade seguransa Indonézia, nune’e bele hafásil Serbisu Imigrasaun Indonézia ba deportasaun.

“Konsuladu Kupang ho Atambua prontu simu sira. Ami husu atu aprezenta-an, hodi fila ba Timor ho dalan legál, nune’e labele lori fali risku ba populasaun TL,” konsuladu ne’e husu.

Komandante UPF, Superintendente Euclides Belo, apela ba timoroan ne’ebé tama ilegál ona ba Atambua atu aprezenta-an iha autoridade seguransa Indonézia, tanba dadaun-ne’e Governu preokupa hela ho variante foun COVID-19.

Superintendente Euclides Belo mós subliña katak, bainhira sidadaun hirak-ne’e parte Indonézia deporta fila, sei halo investigasaun ba inan-aman sira no ema ne’ebé fasilita sira hakat ilegál ba Indonézia.

UPF kompromete sei serbisu hamutuk ho Unidade Polísia Militár F-FDTL, atu halo seguransa másimu liu tán iha liña fronteira, nune’e bele minimiza atividade ilegál iha situasaun Estadu emerjénsia.

Parte konsuladu seidauk identifika loloos númeru sertu, maibé iha duni timoroan balun ne’ebé hakat liu fronteira iha 13 jullu no oras ne’e sei iha hela Atambua.

Iha 13 jullu 2021, autoridade seguransa Indonézia nian, deporta timoroan na’in 14 mai Polísia Imigrasaun Postu Integradu Batugade, tanba deskonfia hanesan membru organizasaun arte marsiál, ne’ebé atu ba ezame sa’e sintu iha Indonézia.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here