Serbisu Imigrasaun hahú loke investigasaun ba timoroan na’in 14, ne’ebé ilegalmente ultrapassa fronteira terrestre ba Indonézia. Investigasaun ne’e hala’o iha kuatantina INAP Comoro, segunda (26/07/21). Imajen Tatoli/Nelson de Sousa.

DILI, 26 jullu 2021 (TATOLI)—Serbisu Imigrasaun, hahú loke prosesu investigasaun ba Timoroan na’in 14 ne’ebé ultrapassa ilegalmente hosi fronteira terrestre ba Nusa Tenggara Timur (NTT), Indonézia, foin lalais ne’e.

Vise-Ministru Interiór (MI), António Armindo, hateten sidadaun hirak-ne’e kumpre ona kuarentena loron 14 iha edifísiu Institutu Nasionál ba Administrasaun Públika (INAP) Comoro, nune’e Serbisu Imigrasaun hahú loké prosesu investigasaun, hodi bele prosesa tuir lei ne’ebé vigora hanesan  hatuur iha rezolusaun Governu tui dekretu  númeru 18/2021 artigu 7, aplika koima ho montante másimu hosi $30 to’o $250 no sei loké prosesu dezobediénsia ba regra Estadu emerjénsia.

Notísia relevante:Abitante na’in-17 hosi Atambua tama ilegál tan

“Kona-bá koima hira mak aplika sei hein investigasaun finál mak bele hatene,” António Armindo, hateten ba jornalista-sira iha kna’ar fatin Vila Verde, segunda ne’e.

Tuir informasaun sekretu ne’ebé ministéiru ne’e simu katak, iha mós sidadaun balun ne’ebé tama ilegál hosi TL, ba ona área Indonézia liuhosi fronteira terrestre no daudaun  ne’e iha ona Atambua.

Vise-Ministru Interiór ne’e informa katak, parte TL serbisu hamutuk ho adidu seguransa iha Atambua atu  identifikasaun hodi bele deporta liuhosi dalan legál, nune’e submete ba kuarentena.

Nia husu ba sidadaun hotu-hotu atu kontribui no koopera ho autoridade seguransa no mós autoridade lokál iha área fronteira atu labele la’o ho dalan ilegál, tanba virus variante foun iha ona Indonézia no hahú rejista makás, bele  fó ameasa bo’ot bainhira iha movimentu ilegál.

Autoridade seguransa Indonézia nian, iha (13/07/21) deporta sidadaun na’in 14 mai Polísia Imigrasaun Postu Integradu Batugade, tanba deskonfia hanesan membru organizasaun arte marsiál, ne’ebé atu ba ezame sa’e sintu iha Indonézia.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here