Suspeitu na’in-haat ho inisiál ZCP, ZS, MSC ho EMCP ne’ebé deskonfia hamete Hilário Fitalício Soares, iha Delta, 10 jullu 2021. Imajen Tatoli/Nelson de Sousa.

DILI, 28 jullu 2021 (TATOLI)—Tribunál Distritál Dili (TDD), liuhosi primeiru interrogatóriu, aplika ona prizaun preventiva ba arguidu na’in-tolu ho inisiál ZCP, ZS, MSC ne’ebé deskonfia envolve iha kazu hamate Hilário Fitalício Soares iha Delta, suku Comoro, postu administrativu Dom Aleixo, munisípiu Dili, foin lalais ne’e.

Tribunál liuhosi juiz turnu aplika medida refere ba arguido-sira tanba iha indísiu forte, envolve iha kazu ne’e no bele asegura arguido-sira durante prosesu judisiál hodi fasilita parte Ministériu Públiku (MP) loke investigasaun profunda ba prova sira.

Notísia relevante:Kazu hamate Fitalício, PNTL detein suspeitu na’in-haat

Alende ne’e, Tribunál Distritál Dili mós aplika Termu Identidade Rezidénsia (TIR) ba arguidu ENCP ne’ebé akuzadu ho krime omesídiu simples no prevista iha artigu 138 kódigu penal, hateten ema ne’ebé oho ema seluk sei hetan pena prizaun tinan ualu to’o 20.

“Kona-bá motivu hosi akontesimentu ne’e sei iha prosesu segredu justisa. Ba desizaun ne’e nu’udár parte defeza hosi arguidu ZCP sei haree fila-fali ho didi’ak ninia impaktu atu halo rekursu ka bele halo bainhira julgamentu normál la’o,” Advogadu privadu, Sérgio Lobo, hateten ba jornalista-sira iha TDD, Mandarin, kuarta ne’e.

Polísia Serbisu Investigasaun Kriminál Nasionál iha 23 jullu simu mandadu detensaun hosi TDD ho númeru Nuc 0155/2021PNSIK.

Tanba ne’e, iha 26 jullu tuku 08:00 otl, ezekuta mandadu detensaun ne’e hodi kaptura suspeitu na’in-haat  iha rezidénsia iha Dili, no detein iha sela durante oras 72.

Prosesu primeiru interrogatóriu ne’e, prezide hosi juiz turnu Ercilia de Jesus, MP reprezenta hosi prokuradór Ricardo Leite Godinho no arguido-sira hetan asisténsia legál hosi defensór públiku, Nelson Borges, Jonas Henrique da Costa  no advogadu privadu Sérgio Lobo ho Arlindo Sanches.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here