Suspeitu na’in-haat ho inisiál ZCP, ZS, MSC ho EMCP ne’ebé deskonfia hamete Hilário Fitalício Soares, iha Delta, 10 jullu 2021. Imajen Tatoli/Nelson de Sousa.

DILI, 26 jullu 2021 (TATOLI)—Polísia Nasionál Timor-Leste (PNTL), detein ona suspeitu na’in-haat ho inisiál ZCP, ZS, MSC ho EMCP, ne’ebé deskonfia oho Hilário Fitalício Soares, iha Delta, suku Comoro, postu administrativu Dom Aleixo, munisípiu Dili, foin lalais ne’e.

Portavóz Komandu Jerál PNTL, Superintendente Xefe, Arnaldo de Araújo, hateten PNTL liuhosi Polísia Serbisu Investigasaun Kriminál Nasionál, simu mandadu detensaun hosi Tribunál Distritál Dili (TDD) ho númeru Nuc 0155/2021PNSIK, iha 23 jullu 2021.

Notísia relevante:Kazu hamate Fitalício, PNTL aprezenta ona ema na’in-17 ba MP

Nune’e, iha 26 jullu 2021, tuku tuku 08:00 Serbisu Investigasaun Kriminál Nasionál ezekuta mandadu ne’e hodi kaptura suspeitu na’in-haat iha rezidénsia iha Dili.

“Daudaun suspeitu-sira detein hela iha sela polísia atu hein aprezentasaun ba TDD, nune’e submete ba primeiru interrogatóriu,’’ Arnaldo de Araújo, hateten ba jornalista-sira liuhosi konferénsia imprensa iha Caicoli, segunda ne’e.

Kona-bá motivu hosi akontesimentu ne’e sei iha prosesu investigasaun, ne’ebé sei aprezenta ba TDD iha primeiru interrogatóriu.

Kazu ema deskoñesidu hamate Fitalício Soares, iha área Delta 3, suku Comoro, postu administrativu Dom Aleixo, munisipíu Dili, akontese iha 10 jullu 2021, tuku 00:45 otl.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here