Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (28/07). Imajen TATOLI/Egas Cristóvão

DILI, 28 jullu 2021 (TATOLI)--Governu liuhosi reuniaun Konsellu Ministru (KM), aprova ho alterasaun Projetu Lei ne’ebé aprezenta hosi Ministru Prezidénsia Konsellu Ministru, Fidelis Manuel Leite Magalhães, kona-ba Komisaun Funsaun Públika (KFP) hodi bele define polítika públika ba funsionamentu Públika.

“Iniativa ne’e ho objetivu atu troka lei atuál ba Komisaun Funsaun Públika, hafoin redasaun finál proposta lei ne’e sei haruka ba Parlamentu Nasionál,” Ministru Fidelis relata hafoin reuniaun ezekutivu, iha Palásiu Governu, kuarta ne’e.

Notísia relevante: Reforma administrativa públika, Governu analiza opsaun polítika lejizlativa kria KFP

Proposta lei ne’e atu garante liután funsionamentu funsaun públika, asegura no garante kompeténsia ezekutivu sira-nia tuir konstituisaun.

“Governu fiar katak lei ne’e sei ajuda atu tau sasán iha fatin ho hakbiit liútan ita-nia funsionalizmu públiku ho ministériu sira, atubele iha polítika rekursu umanu ne’ebé di’ak liu,” nia afirma.

Nune’e mós garante no asegura di’ak liután  independénsia KFP no sei bele halo intervesaun di’ak liután hodi halo arbitrajen, ne’ebé asaun sira refleta ba rekrutamentu tuir méritu  no  promosaun sira.

Lei ida-ne’e sei pretende reforsa garantia independénsia atuasaun KFP no ninia Komisáriu sira,  nune’e mós tuir kedas reforma ba ámbitu intervensaun, liuliu atu rezolve problema sira ne’ebé identifika ona, ne’ebé hanesan difikuldade ba efisiénsia funsionamentu Funsaun Públika.

Nune’e, ho sxperiénsia ne’ebé iha ona, komisaun iha papél apoiu define polítika públika ba funsionamentu públiku no fó kbiit atribuisaun ba ministériu sira no kompeténsia sira hosi órgaun rekursu umanu.

“Kona-ba detallu sira, sei to’o iha Parlamentu mak bele halo faze konsultasaun no debate hafoin bele publika,” nia akresenta.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here