Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Egas Cristovão

DILI, 29 jullu 2020 (TATOLI)-Ministru Prezidénsia Konsellu Ministru, Fidelis Manuel Leite Magalhães, aprezenta opsaun polítika lejislativa, ne’ebé sai hanesan baze ba proposta alterasaun Lei númeru 7/2009, 15 jullu, ne’ebé kria Komisaun Funsaun Públika (KFP).

Aprezentasaun ne’e liuhosi reuniaun Konsellu Ministru (KM) ordinária kuarta ne’e, maibé Governu sei halo analiza hodi haree ba opsaun ne’ebé maka di’ak nu’udar parte ida atu halo reforma administrasaun públika.

“Opsaun hirak ne’ebé aprezenta iha ámbitu reforma administrasaun públika ho objetivu hadi’ak liután maneira jere setór públiku no ninia funsionamentu no halo setór públiku bele efisiente no efikáz liután,” dehan Ministru Fidelis hafoin reuniaun ezekutivu, iha Palásiu Governu.

Governante ne’e subliña, programa reforma administrativa iha komponente barak, ne’ebé komponente ida mak atu haree ba funsionamentu KFP.

“Governu hanoin atu halo administrasaun públika iha Timor-Leste funsiona di’ak liu, tanba ne’e presiza haree didi’ak KFP ninia funsionamentu,” nia akresenta.

Ho razaun ne’e, Prezidénsia Konsellu Ministru propoin diskusaun kona-ba alterasaun ba Lei númeru 7/2009, ne’ebé kria KFP.

“Kona-ba proposta alterasaun sira iha hela faze diskusaun, hafoin iha ajendamentu Konsellu Ministru dehan atu aprezenta maibé tempu maka la to’o, tenke hatama ba iha sirkulasaun iha loron 10 nia laran ba membru Governu sira atu idaidak lee no fó sira-nia parasér, hafoin maka lori ba Konsellu Ministru hodi aprova,” nia esplika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here