Sunu-lilin fó hanoin ba ema ne'ebé lakon ona vida tanba virus HIV-SIDA, no agradese ba sira ne'ebé luta hasoru HIV-SIDA. Imajen Tatoli/Arminda Fonseca

DILI, 28 jullu 2021 (TATOLI)—Dadus hosi Komisaun Nasionál no Kombate HIV-SIDA iha Timor-Leste, hatudu katak, hahú hosi tinan 2003 to’o marsu 2021 ema ne’ebé infetadu ba HIV hamutuk 1.374 no ema ne’ebé konsege halo ona tratamentu hamtuk 656, ema ne’ebé mate tanba virus ne’e hamutuk 155.

Dadus ne’e fó-sai hosi Sekretáriu Ezekutivu Komisaun Nasionál no Kombate HIV-SIDA iha Timor-Leste, Atanásio de Jesus, hafoin partisia selebrasaun loron mundiál hepatitis, iha otél Novo Turizmu, kuarta ne’e.

Notísia relevante:OMS apela nasaun hotu-hotu hamutuk elimina hepatitis iha 2030

“Ita iha kuarter segundu dadus seidauk iha, maibé ami nafatin halo koordenasaun ho Ministériu Saúde bainhira ami rekolla hotu dadus mak ami sei fó-sai,” Atanásio de Jesus, hateten.

Nia mós fó-sai katak, sentru tratatamentu ba pasiente HIV-SIDA iha Ospitál Referál lima mak hanesan Baucau, Maliana, Maubesi, Covalima no Oe-cusse, sentru tratamentu iha nasionál hamutuk tolu mak hanesan Hospitál Nasionál Guido Valadares (HNGV), Klínika Bairru-Pité no Maluk Timor.

Komisaun ne’e mós dala barak enfrenta difikuldade liuliu iha munisípiu, hanesan Lautém no Viqueuqe pasiente-sira tenke foti ai-moruk iha munisípiu Baucau, difikulta pasiente atu asesu ho lalais.

Iha fatin hanesan reprezentante hosi Organizasaun Naun Governamentál (ONG) Estrela+, Inês Lopes, informa Estrela+ kontinua halo screening ba ema ne’ebé afetadu ba HIV-SIDA, oinsá kontinua ba vasina hepatitis.

“Tratamentu ba HIV-SIDA  iha problema boot  durante COVID-19,  tanba pasiente-sira labele asesu ba iha fasilidade saúde,” nia esplika.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here