TDD. Imajen Tatoli /Dok

DILI, 27 jullu 2021 (TATOLI)—Tribunál Distritál Dili (TDD), kontinua rona sasin ba kazu administrasaun danoza ho pekulatu, ne’ebé deskonfia komete hosi arguidu na’in-tolu ho inisiál AS, DFBP, IBPA hosi Ministériu Edukasaun Joventude no Desportu (MEJD).

Sasin ho inisál  PE, hateten nu’udár funsionáriu MEJD iha diresaun planu EMIS desde 2009 to’o agora, no ekipa fó mós apoiu tékniku ba projetu edukasaun iha 2014.

Notísia relevante:Tribunál Kontinua Julga Kazu Administrasaun Danoza no Pekulatu iha ME

Nia mós la lembra loron  momentu ekipa hala’o viajen ba munisípiu Baucau, Lautém, Viqueque no Óe-cusse, ne’ebé bainhira antes dezlokasaun simu kedan osan perdiem ba kada munisípiu semana ida.

Iha sala audiénsia, PE dehan, momentu ne’ebá viajen ba Óe-cusse, maibé la lembra hasoru-malu  ho arguidu  tanba sira-nia ekipa ba liu iha sub rejiaun Oe-silo, nune’e labele hasoru-malu.

Hafoin rona tiha deklarasaun, Tribunál deside adia julgamentu ne’e ba 16 setembru tinan ne’e, iha tuku 15:30 otl, hodi rona sasin seluk tán.

Antes ne’e mós Tribunál rona ona deklarasaun hosi arguidu  no mós sasin lubuk ida.

Tuir depoitmentu Ministériu Públiku (MP), katak iha 08 abríl 2014, arguidu AS submete proposta ida ba Diretór Jerál Serbisu Kooperativa, hodi husu orsan atu realiza atividade iha munisípiu hotu ho montante $16.880.

Maibé, orsmentu viajen ne’ebé arguidu AS apropria ba interese pesoál ho montante $540, tanba arguidu rasik la halo viajen  ba munisípiu-sira hanesan Liquiça iha 01 agostu 2014 no arguidu AS simu tiha osan viajen hamutuk $180.

Ba munisípiu Aileu, 01 jullu 2014, arguidu AS mós simu osan ho montante $120, munisípiu Ermera iha 11 dezembru 2014, arguidu simu osan montante $60, maibé arguidu la halo viajen ba munisípiu sira ne’e no arguidu hala’o viajen ba  Óe-cusse loron ualu de’it, tuir loloos simu osan viajen montante $440, maibé arguidu AS inventa tiha ba loron 10 hodi hetan osan ho montante $120.

Audiénsia julgamentu ne’e, prezide hosi juiz koletivu José Gonçalves, Argentino Neves, Alvaro Maria Freitas no MP reprezenta hosi prokuradór, Domingos Goveia Barreto,  arguidu-a sira hetan asisténsia legál hosi defensór públiku Humberto Alves ho advogadu privadu Pedro Aparicio.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here