Logotipu Tribunál Distritál. Imajen/Egas Cristóvão

DILI, 18 fevereiru 2020 (TATOLI)–Tribunál Distritál Dili (TDD), ohin, kontinua halo audiénsia julgamentu ba kazu administrasaun danoza no pekulatu ne’ebé deskonfia komete husi funsionáriu Ministériu Edukasaun (ME) nian na’in-tolu ho inisiál AS, DFBP ho IBPA.

Notísia Relevante : Tribunál Kontinua Halo Julgamentu ba Funsionáriu ME Na’in Tolu

Iha kontinuasaun julgamentu ne’e, Tribunál rona deklarasaun husi arguidu AS ne’ebé iha tinan 2013-2016 nu’udar Diretór Jerál Ensinu Sekundáriu no Tékniku Vokasionál no Koordenadór Nasionál ba Projetu karta edukativa nian.

Tuir depoimentu husi Ministériu Públiku (MP) katak, iha loron 08 fulan abríl 2014, arguidu AS submete proposta ida ba Diretór Jerál Servisu Kooperativa hodi husu orsamentu atu realiza atividade iha munisípiu hotu ho total $16.880,00. Maibé, orsamentu viajen ne’e apropria fali ba interese pesoál arguidu AS nian ho totál $540.00 tanba arguidu rasik la halo viajen ba munisípiu sira hanesan Liquiçá iha loron 01/08/2014, mezmu arguidu AS simu tiha ona osan viajen hamutuk $180.00.

Ba Munisípiu Aileu, iha loron 01 juñu 2014, arguidu AS mós simu $120.00, ba Munisípiu Ermera, iha loron 11 dezembru 2014, arguido AS simu  $60.00, maibé arguidu la bá munisípiu hirak-ne’e.

Arguidu AS hala’o viajen ba Oé-Cusse loron ualu de’it, tuir loloos arguidu AS simu osan viajen $440.00, maibé arguidu AS inventa tiha viajen ba loron 10 hodi hetan tan osan ho montante $120.00

Arguidu AS  konfesa ba Tribunál katak nia parte rekoñese loos duni viajen bá Oé-Cusse ne’e durasaun loron-ualu, maibé kona-ba inventa ne’e la’ós nia hakarak, maibé tanba karreta mak aat durante loron-rua.

Rona tiha deklarasaun hirak-ne’e, Tribunál adia fali julgamentu ba loron 17 marsu 2020, tuku 16:30 hodi kontinua rona arguidu DFPB, IBPA no sasin sira.

Audiénsia julgamentu ne’e prezide husi juiz koletivu Maria Solana, António Ribeiro ho Maria Modesta. Ministériu Públiku reprezenta husi Prokuradór Jacinto Babo no arguido hetan asisténsia legál husi advogadu privadu no defensór públiku.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here