Kondisaun uma ne’ebé ema deskoñesidu sunu iha suku Ritabou, sábadu (24/07). Imajen TATOLI/Sérgio da Cruz

BOBONARO, 24 jullu 2021 (TATOLI)–Grupu deskoñesidu sunu uma rua bainhira uma-na’in laiha fatin, iha aldeia Samelau, suku Ritabou, postu administrativu Maliana, munisípiu Bobonaro, iha sábadu (24/07) maizumenus tuku 13:50.

Hafoin akontesimenentu, Polísia Nasionál Timor-Leste (PNTL) Unidade Task Force munisípiu Bobonaro, Batallaun Orden Públiku (BOP) no FALINTIL-Forsa Defeza Timor-Leste (F-FDTL) to’o kedan iha fatin akontesimentu no komunika kedas ba Bombeiru atu halo intervensaun rápida, maibé konsege salva de’it uma ida, enkuantu uma ida seluk ahi han maka’as.

Tuir informasaun ne’ebé Agência TATOLI rekolla iha terrenu, grupu deskoñesidu ne’e mai halo provokasaun uluk iha matebian Custódio Pascoa de Fátima nia rezidénsia, bainhira família prepara halo serimónia loron 40 nian, no ikus mai ema hirak ne’e halai lakon tamba Polísia hahú halo atuasaun.

Enkuantu, uma ne’ebé ahi han mutuk, foin lalais iha loron 12 fulan juñu, iha grupu balun konsege baku rahun, hafoin rona matebian Custódio hakotu iis iha Hospital Nasional Guido Valadares (HNGV) Dili.

Ba kestaun ne’e, Polísia lori ona sasin balun atu hato’o deklarasaun iha Komandu PNTL munisípiu Bobonaro.

Aleinde ne’e, ekipa konjunta hosi PNTL, BOP, no F-FDTL tau ona Police Line iha fatin akontesimentu no sei kontinua halo seguransa iha fatin ne’e hodi halibur imformasaun no evidénsia.

Kona-ba kronolojia akontesimentu ne’e, Jornalista tenta halo konfirmasaun hosi uma-na’in no parte Polísia, maibé seidauk bele fó konfirmasaun tamba sei iha prosesu investigasaun nia laran, enkuantu autoridade sei nafatin buka-tuir paraderu autór prinsipál sunu uma ne’e.

Jornalista : Sérgio da Cruz

Editora     : Julia Chatarina

HAKEREK NO HATÁN

Please enter your comment!
Please enter your name here