‘Bee luli manas’ ne’ebé lokaliza iha suku Waimori, postu administrativu Viqueque Villa, munisípiu Viqueque, sai ona fatin turístiku, tersa (28/07/21). Imajen Tatoli/ Vitorino Lopes da Costa.

VIQUEQUE, 27 jullu 2021 (TATOLI)—Governu liu hosi Sekretária Estadu Formasaun Profisionál Empregu (SEFOPE), dezenvolve ona ‘bee luli manas’ ne’ebé lokaliza iha suku Waimori, postu administrativu Viqueque Villa, munisípiu Viqueque, sai fatin turístiku.

“Ami halo ona konstrusaun bee luli manas, dezenvolve ona sai fatin turístiku. Maibé ba jestaun fatin ne’e ami sei entrega ba Ministériu Turizmu Komérsiu no Indústria (MTKI) ,” diretór SEFOPE Viqueque, Simões da Silva, hateten ba jornalista Agência Tatoli, iha Beloi, tersa ne’e.

Notísia relevante:UKL ba suku 11 iha Viqueque sei prosesa kuotasaun

Planu inaugurasaun ba fatin turístiku ne’e sei realiza iha fulan agostu  2021, maibé estrada no konstrusaun balun foin lalais nakfera, nune’e sei iha hela prosesu manutensaun.

Orsamentu kumulativu ba projetu konstrusaun bee luli manas ne’e responsabiliza hosi diresasaun jerál  formasaun no parte SEFOPE munisípiu Viqueque halo monitorizasaun ba projetu de’it.

Projetu konstrusaun fatin bee luli manas ne’e tékniku sira mai hosi sentru formasaun Beaçu ne’ebé formandu ba área Pedreiru, soldadura, karpintaria, konstrusaun sivíl, kanalizasaun eletrisidade mak konstrui.

Fasilidade iha fatin ne’e mak hanesan, pixina ba ema boot no labarik ki’ik, fatin deskansa ba visitor-sira, fatin troka, fasilidade sanitária públiku ida, mini kafétaria no mini merkadu.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here