Prosesu konstrusaun UKL iha munisípiu Viqueque. Imajen Tatoli/ Vitorino Lopes da Costa.

VIQUEQUE, 27 jullu 2021 (TATOLI)—Diretór Programa Nasionál Dezenvolvimentu Suku (PNDS), Munisípiu Viqueque, Estevão de Carvalho, hateten atividade konstrusaun Uma Kbi’it La’ek (UKL), ne’ebé implementa iha suku 36, oras-ne’e daudaun suku 11 foin hahú prosesu distribuisaun kuotasaun.

“Kontrusaun UKL ba suku 36 iha munisípiu Viqueque hamutuk uma 108. Konstrusaun implementa daudaun ne’e balun atinji ona 25%. Iha suku 11 mak foin distribui kuotasaun,” Estevão de Carvalho hateten ba jornalista Agência Tatoli, iha knaar fatin Beloi, Viqueque, tersa ne’e.

Notísia relevante:Konstrusaun UKL iha Uma-Uain Leten atinje 25%

Suku 11 ne’ebé foin distribui kuontasaun ne’e tanba haree ba klima, udan no estrada liga ba suku aat,  difikulta karreta hodi tula materiál konstrusaun.

“Maibé agora udan ladún ona, ne’e karreta asesu mós di’ak ona. Ida-ne‘e konstrusaun mós bele la’o ona,” nia subliña.

Suku sira ne’ebé foin distribui kuotasaun mak hanesan, iha postu administrativu Uatucarbau iha suku rua, postu administrativu Ossu iha suku tolu, Uatulari iha suku neen no Viqueque-Villa iha suku sanulu konstrusaun la’o hotu ona.

Iha tinan fiskál 2021, Governu  hari’i UKL hamutuk 1.254, iha suku 424 ho totál orsamentu millaun $25 no kustu ba kada uma entre $14.000 to’o $17.000.

Iha munisípiu Viqueque, konstrusaun UKL hamutuk 75 mak atinje ona 25 % ne’ebé iha suku  sanulu resin ida (11) ho totál  UKL hamutuk 33 iha prosesu distribuisaun kuotasaun.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here