Ministru Asuntu Parlamentár no Komunikasaun Sosiál (MAPKOMS), Francisco Jerónimo. Iamjen Tatoli/ Sérgio da Cruz.

BOBONARO, 26 jullu 2021 (TATOLI)—Ministériu Asuntu Parlamentar no Komunikasaun Sosiál (MAPKOMS), planeia atu instala torre ba sistema dijitalizasaun Rádiu Televizaun Timor-Leste, Empreza Públika (RTTL,E.P), iha suku Tapo, postu administrativu Bobonaro, munispiu Bobonaro, iha tinan ne’e.

Ministru Francisco Jerónimo, hato’o asuntu ne’e, durante sosializasaun ba prosesu instalasaun sistema dijitál transmisaun multimedia terrestre, RTTL,E.P, ba komunidade postu administrativu Cailaco, iha salaun administrasaun Cailaco, segunda ne’e.

Notísia relevante:MAPKOMS sosializa instalasaun sistema dijitalizasaun RTTL,E.P iha Railaco

“Governu planeia iha tinan ne’e, sei instala tan torre ida iha Tapo taz,” Francisco Jerónimo hateten.

Parte tékniku hosi MAPKOMS halo ona estudu viabilidade no daudaun ne’e sei halo hela Dezeñu Enjeñeiru Detalla (DID), bainhira konklui Governu sei loke tenderizasaun ba públiku atu hahú konstrusaun.

Instalasaun torre iha suku Tapo, tanba torre ne’eb’e instala ona iha Kutulau munisípiu Liquiça, kobre de’it iha postu administrativu Cailaco, no seidauk abranje to’o postu administrative-sira seluk iha Munisípiu Bobonaro.

Orsamentu ne’ebé sei gasta ba konstrusaun torre ne’e ho totál $500.000, maibé ne’e pakote fahe ba torre, uma rua, depois hadi’a mós estrada, dada eletrisidade no mós asesu ba liña internet.

Kona-bá  materiál sofistikadu ne’ebé liga ho instalsaun ne’e, sei responsabliza hosi Governu Xina, bazeia ba akoru ne’ebé MAPKOMS halo ona.

Governu Xina mós sei fó asisténsia téknika ba Timoroan sira, liuhosi formasaun atu nune’e tékniku-sira bele adapta ho sistema dijitalizasaun, nune’e projetu instalasaun remata iha sustentablidade ba Timoroan tomak.

Tuir planu, tinan ne’e MAPKOMS sei instala de’it torre neen ho Orsamentu Jerál Estadu (OJE) 2021, tanba situasaun COVID-19.

Iha 2023, Governu garante sei instala hotu torre iha munisipiu 12 bazeia ba tuir planu ne’ebé trasa ona katak, iha 2023 populasaun iha territóriu tomak 90% mak sei asesu RTTL,E.P ho sistema dijitál.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here