MAPKOMS, Francisco Jerónimo ho ekipa hala’o sosializasaun ba dijitalizasaun RTTL,E.P iha postu administrativu Railaco, kinta (15/07/21). Imajen Tatoli/Felicidade Ximenes.

DILI, 15 jullu 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo ho ekipa, hala’o sosializasaun ba prosesu instalasaun sistema dijitalizasaun transmisaun multimédia terrestre iha postu adminsitrativu Railaco, Munisípiu Ermera.

“Prosesu instalasaun sistema dijitalizasaun transmisaun multimédia terrestre ne’e, programa VIII Governu nian ne’ebé hakarak diversifika komunikasaun sosiál iha nasaun ne’e,” Francisco Jerónimo hateten durante diskursu iha psotu adminsitrativu Railaco, Munisípiu Ermera, kinta ne’e.

Notísia relevante:MAPKOMS hakarak tau importánsia ba infrastrutura RTTL,E.P

Governante ne’e esplika, ohin loron tama iha mundu dijitál, nune’e Governu hakarak diversifika komunikasaun sosiál, hahú ho pasu dahuluk mak diversifika dizitilizasasun ba Rádiu Televizaun Timor-Leste, Empreza Públika(RTTL,E.P).

Prosesu instalasaun ba dijitalizasaun ne’e mosu tanba to’o oras ne’e, RTTL,E.P sei utiliza programa analog nune’e, iha esforsu ne’e Governu hakarak muda ba sistema dijitál, hafásil komunidade ne’ebé iha baze bele asesu informasaun.

Muda ba sistema dijitál katak, frekuénsia ida-ne’e bele fornese ona kanál 10-resin, enkuantu Sistema analog iha de’it frekuénsia no kanál ida.

Sistema dijitalizasaun ne’e mós sei lori vantajen ba komunidade iha baze la presiza tan atu hola parabola.

Tanba ne’e, Francisco Jerónimo informa, programa ida-ne’e nu’udár programa pilotu ne’ebé Governu Xina mak oferese materiál hotu-hotu ho dijitál, no Governu TL mak prepara torre, no husu ba autoridade-sira atu fó apoiu másimu ba susesu programa ne’e.

“Ha’u mai iha ne’e ho Governu nia naran, husu ba hotu-hotu iha Railaco, lideransa komunitária,  xefe aldeia, joven,  veteran no entidade hotu-hotu ita apoiu-malu atu halo Instalasaun  ba antena ida-ne’e la’o ho di’ak,’’ MAPKOMS, husu.

Iha fatin hanesan, adminsitradór postu admisitartivu Railaco, Arlindo dos Santos, agardese ba Govenru tanba bele sosializa asuntu instalasaun sistema dijitalizasaun transmisaun ida-ne’e ba komunidade iha postu administrativu ne’e.

Arlindo do Santos, fiar katak sei laiha dezintendimentu, tanba programa ida-ne’e di’ak tebes ba komunidade atu oinsá bele asesu informasaun iha nível nasionál no internasionál ho di’ak.

Tuir planu, semana oin ekipa hosi MAPKOMS sei tun ba terrenu hodi rekolla dadus uma-ka’in nune’e, bele hahú  instalasaun antenna.

Sosializasaun  ne’e partisipa hosi Asesór Planeamentu MAPKOMS, Diretór DNDI, Prezidente TATOLI.IP, Prezidente Autoridade Munisípiu Ermera, Adminsitradór Postu Adminsitrativu Railaco no entidade relevante sira-seluk hosi postu administrativu Railaco.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here