UPF asegura pontu entrada Batugade, Bobonaro. Imajen Tatoli/Eugénio Pereira.

DILI, 16 fevereiru 2021 (TATOLI)-Ekipa Forsa konjunta Polísia Nasionál Timor-Leste (PNTL) no FALINTIL-Forsa Defeza Timor-Leste F-(FDTL), hosi loron 10 fevereiru to’o tersa ne’e, detein tan abitante  na’in-17 ne’ebé halo viajen ilegál hosi Atambua, Timor Osidentál tama-mai Timor-Leste.

Ema hirak ne’e kompostu hosi sidadaun estranjeiru feto ida no na’in-16 mesak estudante Timoroan sira ne’ebé tama ilegál tanba dokumentu estudu nian hanesan KITAS no pasaporte atu inválidu ona. Nune’e obriga sira tama ilegál  hosi Covalima no Bobonaro hodi entrega aan ba Unidade Patrullamentu Fronteira (UPF).

Notísia Relevante : PNTL ho ekipa COVID-19 foti obrigatóriu ema 11 submete ba kuarentena

UPF halo operasaun tama-sai ai-laran iha fronteira terrestres Bobonaro. Imajen Tatoli/Eugénio Pereira

“Dezde loron 10 to’o ohin, ema tama ilegál hamutuk na’in-17,” portavós Komandu Jerál PNTL,  Arnaldo de Araújo, informa ba jornalista iha Komandu Jerál PNTL, Dili.

Arnaldo hatutan, PNTL sei kriminaliza sidadaun sira-ne’e hafoin kumpre tiha loron 14 iha konfinamentu obrigatóriu iha fatin kuarentena  Batugade, Bobonaro.

Komandante Arnaldo Araújo rekoñese, mezmu forsa sira halo seguransa maka’as, maibé abitante sira kontinua tama iha tempu kalan-boot, tanba liña fronteira luan susar ba polísia atu deteta tama iha tempu kalan boot no dadeer nakukun.

“Ita nia maluk sira ne’e ulun fatuk moruk sempre gosta atravesa ba Indonézia ne’ebá, to’o ikus lori moras mai, maibé ha’u atu dehan katak, forsa-rua halo ona seguransa másimu tebes,” Arnaldo hateten.

Arnaldo hatutan, PNTL mós koloka ona forsa ba estabelesimentu Destakamentu Unidade Territoriál para apoia forsa tátiku sira iha fronteira Bobonaro, Covalima no Oe-Cusse no Atauro nian no halo pasa revista

“Komandu jerál koloka ona forsa ba Destakamentu Unidade Territoriál hodi dezloka ba fronteira rua-ne’e,” nia hateten.

Komandu PNTL mós harii ona postu provizóriu iha área Atabae, Balibo, Tunubibi, Covalima, Oe-Cusse no Atauro.

Tuir observasaun Agência Tatoli, segunda (15/02), Governu Timor-Leste loke fronteira Batugade hodi fasilita transporte sira ne’ebé tula sasán nesesidade báziku no ekipamentu seluk tan hosi Atambua-Timor Osidentál tama mai pontu entrada Timor-Leste nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here