Ministru Obra Públika, Salvador Eugênio Soares dos Reis Pires, akompaña ho Vise Ministru Obra Públika, Nicolau Lino Freitas Belo, halo diskusaun define prioridade MOP tinan 2022. Imajen TATOLI/Florêncio Miranda Ximenes

LIQUIÇÁ, 26 jullu 2021 (TATOLI)-Ministériu Obra Públika (MOP) hamutuk ho ajénsia no orgaun autónomu sira, halo reuniaun hodi hahú halo diskusaun no define prioridade, bazeia ba pakote fiskál 2022 ne’ebé Ministériu Finansa (MF) distribui ona foin lalais ba ministériu ne’e ho montante $157.140.777.

Ministru Obra Públika, Salvador Eugênio Soares dos Reis Pires, hateten, objetivu reuniaun ne’e atu halo avaliasaun ba ezekusaun Orsamentu Jerál Estadu (OJE) tinan 2021 no distribui pakote fiskál 2022 ba orgaun ne’ebé ligasaun ho ministériu hanesan, Eletricidade de Timor-Leste, Empreza Públika (EDTL, E.P), Bee Timor-Leste, Empreza Públika (BTL, E.P), Institutu Jestaun Ekipamentu, Institutu Públiku (IGE, I.P), inklui Diresaun Jerál, Nasionál no Departementu sira.

“Ami ho orgaun tutela direita no indireita Ministériu Obra Públika, atu haree fahe pakote  ne’ebé aloka ona ba ami,” Ministru Salvador, hateten, iha salaun Madre, iha postu administrativu Maubara, munisípiu Liquiçá, segunda ne’e.

Hosi totál $157.140.777 ne’ebé aloka ba MOP, fahe ba kategoria saláriu no vensimentu $2.773.899, bens no servisu $14.181.929, kapitál menór laiha, kapitál dezenvolvimentu $20.184.949 no transferénsia públiku $120.000.000.

Foku ba prioridade tolu

Iha tinan oin, MOP foku ba prioridade iha área tolu hanesan bee-moos, eletrisidade no estrada nasionál to’o rurál.

“Ami hanoin ba estrada rurál, atu kontinua halo reabilitasaun tanba iha tinan 2021, halo ona konkursu públiku reabilitasaun projetu ho totál distánsia kilómetru 324, ne’ebé daudaun ein kursu hela no prosesu iha Komisaun Nasionál Aprovizionamentu (CNA, sigla portugés) inklui manutesaun períodu rutina kilómetru 800-resin,” Ministru Salvador informa.

Notísia relevante: Tinan ne’e, Governu reabilita ona estrada rurál pakote 66

Nune’e, sei halo reabilitasaun ba estrada hodi atinje meta ba estrada rurál hamutuk kilómetru 500 iha territóriu nasionál.

Kona-ba eletrisidade, MOP liuhosi EDTL, E.P loke ona konkursu ba instalasaun iha suku 34 no suku balun ne’ebé seidauk sei tama iha faze daruak atu kompleta distribuisaun liña eletrisidade ba suku 76 ne’ebé seidauk asesu.

“Ha’u husu ba EDTL, E.P atu haree no fó prioridade ba aldeia sira ne’ebé nia suku asesu ona eletrisidade, maibé sira seidauk asesu ba eletrisidade, nune’e presiza halo investimentu ba setór ida-ne’e,” nia fó hanoin.

Notísia relevante: Aldeia Soikili tinan barak seidauk asesu eletrisidade

Aleinde ne’e, EDTL, E.P atu kontinua fó prioridade ba dijitalizasaun sistema distribuisaun liña eletrisidade atubele halo kontrolu ho efisiente no kontrolu di’ak liután bainhira eletrisidade mate.

Foku mós ba planu konverte ba naturál gás iha sentrál elétrika Hera no Betano, atu redús kustu kombustível ba liña eletrisidade no hahú halo investimentu ba enerjia renovável no solár painel.

“Ami koa’alia ona ho Ministériu Finansa kona-ba preparativu sira, ne’ebé ita kontinua fó prioridade iha tinan 2022, atubele tama faze implementasaun, nune’e bele mellora enerjia eletrisidade iha Timor-Leste,” governante ne’e afirma.

Kona-ba bee-moos, Ministru dehan, BTL, E.P hakarak kontinua hasa’e kobertura fornesementu bee, ne’ebé daudaun halo hela projetu dezeñu detalladu iha postu administrativu sira hamutuk 35, iha tinan ne’e.

Nune’e, iha tinan oin, MOP hakarak hasa’e investimentu hodi atinje kobertura bee-moos ba sidadaun liuhosi foku ba projetu jestaun bee idróliku atu konserva bee-matan sira no bee kualidade ba konsumu umanu.

“Ita promove ona polítika nasionál jestaun rekursu idróliku no polítika abastesimentu bee inklui dekretu-lei bee kualidade ba konsumu umanu, ne’ebé promulgadu ona, tanba ne’e tenke implementa,” nia subliña.

Reuniaun ne’e, partisipa hosi Vise Ministru Obra Públika Nicolau Lino Freitas Belo, Prezidente Konsellu Administrasaun EDTL-EP Paulo da Silva, Prezidente Konsellu Administrasaun BTL,E.P, Carlos Peloi dos Reis, Prezidente IGE, I.P Hermenegilda Laurentina, Diretór Jerál Obra Públika Rui Hernani no Diretór Jerál Administrasaun no Finansa Januário Barbosa inklui Diretór no Xefe Departamentu sira.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here