Komunidde iha aldeia Soikili, suku Parlamentu, simu membru Governu sira no entidade relevante, sesta (23/07). Imajen TATOLI/Natalino Belo

LAUTÉM, 23 jullu 2021 (TATOLI)–Xefe suku Parlamentu, postu admistrativu Lautém, munisípiu Lautém, Angelo C Silva, hateten, aldeia Soikili iha suku ne’e desde tempu okupasaun to’o ukun an seidauk asesu liña elektrisidade.

“Suku Parlamentu, liuliu aldeia Soikili durante tempu okupasaun to’o agora ami nafatin iha nakukun laran, hahú hosi Governu dahuluk to’o agora,” Xefe suku informa liuhosi diálogu komunitáriu iha aldeia Soikili, sesta ne’e.

Tanba ne’e, ho prezensa membru Governu sira halo diálogu komuniáriu liuhosi programa ‘Naroman ba Suku’, líder komunitáriu hato’o problema infraestrutura bázika hanesan estrada, edukasaun, saúde, agrikultura inklui liña telefónika iha área remota ne’e.

Notísia relevante: Diálogu komunitáriu iha suku Euquise, membru Governu husu prepara proposta

Xefe suku konsidera, prezensa membru Governu sira iha suku ne’e importante hodi observa no konsidera proposta ne’ebé autoridade suku sira prepara ona.

“Ami sira-ne’e parte hosi sidadaun ka lae? tanba durante ne’e suku no aldeia sira maioria hetan ona naroman, maibé ami seidauk,” nia akresenta.

Notísia relevante: Hahú ohin, EDTL,E.P lansa konkursu instala eletrisidade pakote 30

Nune’e mós, nia husu Governu atu konstrui postu saúde iha suku Parlamentu hodi fasilita komunidade halo tratamentu saúde tanba durante ne’e la’o dook.

“Ami-nia esperansa, molok Governu nia mandatu ramata, halo netik obra ruma iha ami-nia aldeia no suku ne’e atu sai sasukat ba ami nafatin relembra obra sira ba futuru,” Angelo subliña.

Aldeia Soikili kompostu hosi populasaun hamutuk 717, hosi uma-kain 150.

Enkuantu, suku Parlamentu kompostu hosi aldeia lima hanesan Iparira, Ira-ara, Lai Ara, Moro inklui Soikili, ho totál populasaun 3.256, hosi uma-kain 721.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here