Deputado FRETILIN, Joaquim dos Santos. Imajen Tatoli/Egas Cristóvão

DILI, 26 jullu 2021 (TATOLI)—Komisaun A ne’ebé trata asuntu Konsitusionál no Justisa lideradu Deputadu Joaquim dos Santos, haruka ona relatóriu no paresér kona-ba proposta Lei Organizasaun no Funsionamentu Tribunál (LOFT) sira ba Prezidente Parlamentu Nasionál, Deputadu Aniceto Longuinhos Guterres Lopes.

Notísia Relevante: Governu aprova lei organizasaun no funsionamentu Tribunál

“Relatóriu no paresér kona-ba proposta Lei Lei Organizasaun no Funsionamentu Tribunál sira ami haruka ona ba Prezidente Parlamentu Nasionál, prezidente mak iha kompeténsia halo ajendamentu hodi halo aprovasaun iha finál globál,” Prezidente Komisaun A, Deputadu Joaquim dos Santos ‘Boraluli’, informa ba jornalista sira, iha Parlamentu Nasionál, segunda ne’e.

Prezidente Komisaun A esplika, iha inisiativa rua, ida hosi Deputadu sira mak projetu-lei, ida fali proposta-lei hosi Governu, nune’e iha diskusaun espesialidade presiza halo ho estruturante atubele sai referénsia hodi halo diskusaun ba artigu kada artigu.

Nia haktuir, iha momentu ne’e deputadu sira Komisaun A halo konsensu ida hodi elemina tiha projetu-lei no foka de’it ba proposta-lei Governu nian ho totál artigu hamutuk 85.

Prezidente Komisaun A ne’e fó-sai katak, deputadu sira hosi Komisaun A mós revoga ona regulamentu UNTAET númeru 11/2002, ne’ebé mak harii Tribunál primeira instánsia haat (4), Tribunál Rekursu ida hanesan konstituisaun fó dalan hodi funsiona hanesan Tribunal Instánsia másima nu’udar Supremu Tribunál.

Iha momentu ne’e mós iha konkordansia atu harii Tribunal Supremu ho Juis na’in-hitu (7) juis kareira nian haat (4), depois sei halo rekrutamentu bazea ba méritu ba juis na’in-tolu (3) tán, nune’e kompleta na’in-hitu (7) hodi serbisu iha Tribunal Supremu.

Nune’e mós konkorda aumenta tán juis na’in-sia (9) iha Tribunal Rekursu, hodi hala’o kna’ar ba julgamentu ba matéria defaktu, matéria direitu no matéria penal nian.

Prezidente Komisaun A ne’e fó-sai katak, deputadu sira konkorda ona iha tinan rua (2) bainhira lei ne’e vigora tenke instala Tribunál Supremu.

Nune’e deputadu no entidade sira konkorda atu harii Tribunál Primeiru Instánsia, Tribunal sia (9) iha Munisípiu 13 nune’e fasilita povu sira-ne’ebé mak presiza justisa, no parte ezekutivu nian halo kompromisu kada tinan ida sei harii tribunál tolu.

Entretantu, Komisaun A finaliza ona diskusaun iha espesialidade ba proposta-lei númeru 28/(3ª) kona-ba Organizasaun no Funsionamentu Tribunal sira. Diskusaun ne’e realiza hahú hosi loron 15 to’o 17 fulan-jullu tinan 2021, iha Salaun Mukit Aisirimou, Munisípiu Aileu.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here