Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (10/02). Imajen TATOLI/Egas Cristovão

DILI, 10 fevereiru 2021 (TATOLI)Liuhosi reuniaun Konsellu Ministru (KM), Governu aprova proposta lei ne’ebé aprezenta husi Ministru Justisa, Manuel Cárceres da Costa, kona-ba organizasaun no funsionamentu Tribunál.

“Proposta ne’e sai ona sujeitu deliberasaun iha loron 28 outubru liubá no tanba iha alterasaun substansiál sira iha nia redasaun ikus maka presiza reapresiasaun,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu, kuarta ne’e.

Projetu proposta lei ne’e refere instalasaun organizasaun no funsionamentu Supremu Tribunál Justisa, kria kondisaun atu halibur juíz sira ho karreira esperiénsia, tanba to’o ohin loron ninia funsaun kontinua asegurada husi Tribunál Rekursu.

“Propoen mós aprovasaun ba enkuadramentu jurídiku ne’ebé permite ba futuru bele halo instalasaun ba jurizdisaun administrativa no fiskál, ne’ebé bele julga rekursu kona-ba desizaun sira husi órgaun Estadu nian, nune’e mós litíjiu administrativu no fiskál sira seluk,” nia akresenta.

Portavós Governu ne’e esplika, natureza atuál Tribunál Distritál sira hanesan mós Tribunál Jurizdisaun komún.

“Sei prevee mós posibilidade ba dezdobramentu Tribunál Jurizdisaun komún sira ho kompeténsia espesializada iha matéria kriminál no mós bainhira volume no komplesidade prosesu kometidu ba Tribunál Judisiál husi primeira instánsia justifika, ba juizu ho kompeténsia espesializada iha matéria família no labarik kiik sira,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here