Membru PNTL hala’o patullamentu tama-sai bairru iha Dili, hodi asegura komunidade iha situasaun serka sanitária, kuarta (12/05/21). Imajen Tatoli/António Gonçalves.

DILI, 19 jullu 2021 (TATOLI)—Polísia Nasionál Timor-Leste (PNTL), halo identifikasaun ba ema na’in-17, no aprezenta ona ba Ministériu Públiku (MP), kona-bá kazu hosi ema deskoñesidu hamate Fitalício Soares, iha área Delta 3, suku Comoro, postu administrativu Dom Aleixo, munisipíu Dili, iha (10/07).

“PNTL liuhosi serbisu investigasaun, halo ona identifikasaun ba ema na’in-17, sira-nia prosesu lori ona ba MP hodi loke prosesu tuir-mai ba Tribunál,” Portavóz Komandu Jerál PNTL, Superitendente Xefe, Arnaldo Araújo, hateten ba jornalista-sira liuhosi konferénsia impresa iha komandu jerál Caicoli, segunda ne’e.

Notísia relevante:PNTL-SIJK hein rezultadu teste médika ba mate-isin Guido Sam Martins

Portavóz ne’e seida’uk adianta uluk ema na’in hira mak envolve direta iha akontesimentu ne’e, maski halo ona prosesu identifikasaun, tanba sei hein delegasaun kompeténsia MP ba mandadu kapturasaun.

Antes ne’e, família matebian, Diego Ferreira, sente triste tanba lakon ona sira-nia ema diák ida iha família ne’ebé oho hosi ema deskunesidu, nune’e  husu PNTL atu kontinua  buka-tuir suspeitu-sira ne’ebé envolve iha kazu ne’e.

Nune’e mós Jeferina Marsela da Silva, nu’udár  kost na’in haktuir kronolojia katak, momentu mosu akontesimentu  iha tuku 22:00 otl, sira-nia parte toba dukur ona, maibé derrepente rona ema duni-malu iha estrada.

Hafoin akontesimentu, nia parte ho família no viziñu-sira komunika kedan ba parte polísia no ambulánsia hodi transporta matebian ba Ospitál Nasionál Guido Valadares  (HNGV sígla portugés), hodi hetan tratamentu liu minutu balun la konsege sala vida.

Matebian hosi postu administrativu Luro, munisípiu Lautém, ne’ebé semana kotuk halo ona prosesu funebre iha moris fatin.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here