Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

DILI, 26 jullu 2021 (TATOLI)—Asosiasaun Halibur Defisiénsia Matan Timor-Leste (AHDMTL) fó formasaun ba formadór defisiénsia na’in-hitu (7) durante loron 12 nia laran, nune’e bele hanorin letra braille ba ema ho defisiénsia matan sira. 

Notisia Relevante: AHDMTL fó formasaun Letra Braille ba ema defisiénsia matan

Diretór Ezekutivu AHDMTL, Gaspar Afonso, segunda ne’e informa AHMDTL hamutuk ho The United Nation Children Fund (UNICEF) no parte Ministériu Edukasaun Juventude no Desportu (MEJD), lansa programa no abertura ba treinamentu kona-ba letra braille ba formadór defisiénsia sira iha AHDMTL.

“Ami prepara ita-nia formadór sira-ne’e atu kontinua hanorin ema ho defisiénsia matan sira iha AHDMTL inklui ema ho defisiénsia sira iha munisípiu sira,” Gaspar Afonso hatete ba Agéncia TATOLI, iha nia knaar fatin, Manleuana, Dili, segunda ne’e.

Nia dehan, antes ne’e formadór sira-ne’e hanorin ona iha AHDMTL ne’ebé ho nia formandu sira-ne’ebé mak kondisaun fíziku hanesan defisiénsia, maibé liuhosi formasaun ne’e bele aumenta no hakle’an liután sira-nia koñesimentu no hasa’e sira-nia abilidade nu’udar manorin ida-ne’ebé di’ak.

Formasaun ne’e apoiu hosi UNICEF ho orsamentu $3.710,00 no hosi osan ne’e atu fasilita formadór defisiénsia sira no halo peskzia ba ema ho defisiénsia matan sira iha munisípu sira.

Iha fatin hanesan, Ofisiál UNICEF, Vicente Lopes hatete UNICEF fó formasaun oioin ba formadór AHDMTL no halo peskiza ba ema ho defisiénsia iha suku ne’ebé mak presiza ajuda.

Formasaun no peskiza ne’e hahú hosi Munisípiu Ermera, Liquiça no Bobonaro maibé formasaun ba formadór sira-ne’e sei implementa iha Dili no seidauk habelar ba munisípiu sira.

Bainhira treinamentu ramata, Ofisiál UNICEF hateten, formadór sira-ne’e sei ba hanorin formandu hamutuk 35 iha AHDMTL, depois mak kontinua fali ba munisípiu seluk. 

Aleinde ida-ne’e, Vicente hatutan, UNICEF sei apoiu mós parte infraestrutura mak atu konstrui fatin formasaun no rezidénsia maibé daudaun ne’e foin hahú ho formasaun no dormitóriu.

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here