Koordenadór Forsa-Tarefa ba Prevensaun no Mitigasaun surtu COVID-19 iha Timor-Leste, hosi Sala Situasaun SIJK, Rui Maria de Araújo. Imajen Tatoli/Egas Cristóvão.

DILI, 23 jullu 2021 (TATOLI)—Sala Situasaun, Sentru Integradu Jestaun Krize (SIJK), anunsia katak, Timor-Leste (TL) rejista ona sidadaun na’in-haat ne’ebé infetadu COVID-19 ho variante delta, no oras ne’e hala’o hela tratamentu iha izolamentu.

“Informa ba públiku katak, rezultadu sekuensiasaun genómica hosi amostra 300 ne’ebé Laboratóriu Nasionál Saúde haruka iha 14  jullu 2021 ba  Peter Doherty Institute for Immunity and Infection, The University of Melbourne, ho pedidu atu halo teste urjente ba amostra balun, hatudu katak, amostra hosi ema na’in-haat iha lineajen B.1.617.2 (Delta), variante ne’ebé preokupante, ka variant of concern,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, sesta ne’e.

Notísia relevante:MS lansa kampaña konjunta vasinasaun COVID-19

Ema na’in-haat ne’e antes ne’e tama mai hosi Indonézia iha loron  26 juñu ho loron 08 jullu, sira na’in-haat  iha hotu kuarentena no izolamentu.

“Maibé ida negativu ona, no fila  ona ba uma, na’in-tolu seluk mak sei nafatin iha izolamentu. To’o agora seidauk iha evidénsia, katak variante ida-ne’e, da’et ona iha komunidade,” Rui Maria de Araújo, hateten.

Kazu foun ohin 54 mai hosi Dili 40 no Munisípiu-sira seluk na’in 14, kompostu hosi mane 29 no feto 25.

Hosi totál kazu detetadu foun ohin, ho idade 12 mai karaik na’in-rua, entre tinan 12-59 na’in 51 (94,4%), idade 60 mai karaik  na’in-ida, no 24% sintomátiku.

Jornalista: Felicdade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here