MESSK-ANAAA lansa ofisial akreditasaun programatiku institusional 2021.iha salaun unital, sexta (23/07). Imajen TATOLI/Egas Cristóvão.

DILI, 23 jullu 2021 (TATOLI)—Ministru Ensinu Superiór, Siénsia no Kultura (MESSK), Longuinhos dos Santos, sesta ne’e halo lansamentu ofisiál ba avaliasaun no akreditasaun programátiku no institusionál tinan 2021.

Ministru Ensinu Superiór, Siénsia no Kultura (MESSK), Longuinhos dos Santos, hateten iha tinan 2016 ANAAA implementa ona avaliasaun programátika no institusionál, ho nia objetivu prinsipál atu sukat kualidade no desempeña hosi Instituisaaun Ensinu Superiór sira hotu.

Notísia Relevante: ANAAA sei avalia kursu 24 husi Ensinu Superiór hitu

“Avaliasaun ne’e fó informasaun ba sosiedade sivíl sira kona-bá funsionamentu no kualidade hosi instituisaun ensinu superior sira no atu promove kultura internál nian, kona-bá kualidade hosi instituisaun ensinu superior tantu públiku no privada sira,” Longuinhos dos Santos hateten liuhosi diskursu iha serimónia lansamentu ofisiál ba avaliasaun no akreditasaun programátiku no institusionál tinan 2021, iha Universidade Oriental Timor Lorosa’e (UNITAL), Becora, Díli, sesta ne’e.

Oitavu Governu Konstitusionál liuhosi Ministériu Ensinu Superiór, Siénsia no Kultura ne’e, ho objetivu prinsipál atu bele hadi’a no asegura kualidade ensinu superiór sira, nune’e prezensa ANAAA hala’o nia papel atu bele promove avaliasaun ba programátika no institusionál hodi hadi’a kualidade ensinu superiór públiku no privada sira.

MESSK-ANAAA hasai foto hamutuk lansa ofisial akreditasaun programatiku institusional 2021.iha salaun unital, kinta (23/07). Imajen TATOLI/Egas Cristóvão.

“Rezultadu avaliasaun ba programátiku hamutuk 105 ne’ebé hahú avalia hosi tinan 2016 to’o iha 2019 no nia nível rezultadu ne’ebé maka la to’o tuir Estadu nia presiza. Tanbá ne’e, ohin, ita realiza hikas avaliasaun programátiku hamutuk 24 no re-akreditasaun institusionál hamutuk ualu. Espera iha indikasaun ne’ebé pozitivu liuhosi indikadór ne’ebé prepara ona hosi Ajénsia Nasionál Avaliasaun Akreditasaun Akadémika nian,” nia dehan.

Governante ne’e hateten, mezmu Timor-Leste hasoru dezafiu ka difikuldade ho situasaun pandemia COVID-19 maibé garante katak avaliasaun programátiku no institusionál hala’o ho rigór, siéntifiku atu bele garante prinsípiu transparante no independénsia.

Nia hato’o agradese liu-liu ba Magnifiku Reitór, Prezidente sira hosi instituisaun Ensinu Superior tantu públiku no privada no ba avaliadór nasionál no internasionál (Australia, Filipina, Malázia no Indonézia), espera iha prosesu ida ne’ebé lidera hosi ANAAA bele promove esperitu parseriu no bele promove esperitu kolaborasaun ho parseriu hotu-hotu.

Diretór Ezekutivu Ajénsia Nasionál Avaliasaun Akreditasaun Akadémika (ANAAA), Edmundo Viegas, hateten atividades avaliasaun no akreditasaun programátiku no institusionál ne’e sei hahú durante fulan agostu to’o novembru 2021.

“Durante fulan ha’at tomak nia laran, ita atu avalia grupu kursu hamutuk 24, ne’ebé konsiste hosi kursu Lisensiatura no Baxarelatu hamutuk 20 no Maestradu haat, hosi instituisaun hitu,” nia dehan.

Diretór Ezekutivu ANAAA, Edmundo da Silva Viegas Entrega sertifikadu ba Universitario sira nebe’e hetan akreditasaun programatiku institusional 2021.iha salaun unital, sexta (23/07). Imajen TATOLI/Egas Cristóvão.

Hosi 24 grupu kursu ne’e, ANAAA sei hala’o iha faze rua mak faze avaliasaun dokumentu no kalendarizasaun atu vizita instituisaun sira-ne’ebé avaliadór nasionál sira sei marka prezensa ba vizita prezensiálmente no avaliadór internasionál sira sei partisipa liuhosi plataforma virtual.

Hosi setembru to’o novembru ANAAA sei avalia fali grupu daruak hanesan instituisaun ualu ne’ebé sira hetan akreditasaun ba dala tolu hanesan Universidade Nasional Timor Lorosa’e (UNTL), Universidade da Paz (UNPAZ), Institute of Business (IOB), Institute of Tecnology (DIT), Institutu Profisionál de Canossa (IPDC), Institutu Superior Cristal (ISC), Institutu Siénsia Relijioza (ICR) Lahane, no Instituto Katólika Formasaun Profesores (ICFP) Baucau.

“Instituisaun ualu ne’e sei hetan avaliasaun institusionál. Iha avaliasaun ba dala tolu ne’e, ami halo adaptasaun uitoan ho manuál avaliasaun, hanesan avaliasaun baibain ne’ebé ita liu tiha ona iha tinan lima liubá, ami halo avaliasaun komponente ida loos de’it, ne’ebé ami uza manuál ne’ebé estabelese iha 2007 no 2008,” nia akresenta.

Reitór Universidade da Paz (UNPAZ), Adolmando Soares hateten iha akreditasaun programátiku nian, UNPAZ sei lori programa hamutuk haat hanesan tolu iha nível maestradu no ida iha nível lisensiatura.

“Ami otimista katak programa haat ne’ebé ami lori ba akreditasaun, sei akreditada hotu iha tinan ida-ne’e,” nia dehan.

Kona-bá esforsu, nia dehan, UNPAZ iha programa estudu hamutuk 20, ne’ebé restu hetan ona akreditasaun, tolu hetan valór B, no sira seluk hetan valór C.

“Agora lori tan haat no iha re-akreditasaun ba tinan ne’e, ida-ne’ebé hetan C ne’e ami atu lori tan, nune’e atu muda estatutu hosi C ba hetan B-A,” nia hateten.

Entretantu, kategória kursu ba avaliasaun no akreditasaun hamutuk 24, hanesan Universidade da Paz (UNPAZ) ba Maestradu mak Direitu, Saúde Públika, no Administrasaun Públika, no Lisensiatura hosi UNPAZ hanesan Civil Engeneering.

Universidade Oriental Timor Lorosa’e (UNITAL) nia Lisensiatura hanesan Direitu, Saúde Públika, Enfarmajen, Administrasaun Públika, Relasaun Internasionál, Agrofloresta, no Peskas.

Universidade Dili (UNDIL) nia Lisensiatura hanesan Saúde Públika, Dentária, Enfarmajen, Eng. Petrolium no Lisensiatura hosi Institutu Superior Cristal (ISC) hanesan Enfarmajen no Baxarelatu hosi ISC mak parteira.

Universidade Nasional Timor Lorosa’e (UNTL), nia Lisensiatura hanesan Nutrisaun, Farmasia, Komunikasaun Sosiál, Ensinu de lian Tetum, no nia Baxarelatu Ensinu Edukasaun físika no desportu.

Institute of Business (IOB) nia Lisensiatura hanesan kontabilidade komputadór. Enkuantu maestradu hosi Institute of Tecnology (DIT), hanesan Administrasaun Negósiu.

Totál avaliadór ne’ebé sei halo avaliasaun no akreditasaun ba programatiku 24 hamutuk avaliadór na’in-36. Hosi númeru ne’e avaliadór nasionál na’in-24 no internasionál na’in-12.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here