Diretór Ezekutivu ANAAA, Edmundo da Silva Viegas. Imajen/UNILAB

DILI, 22 jullu 2021 (TATOLI)—Ajénsia Nasionál Avaliasaun Akreditasaun Akadémika (ANAAA), tuir planu aban (23/7) fulan ne’e, sei halo lansamentu akreditasaun programátiku-24, no institusionál hamutuk ualu (8) iha Universidade Oriental Timor Lorosa’e(UNITAL).

Serimónia lansamentu avaliasaun no akreditasaun akademika ne’e sei prezide hosi Ministru Ensinu Supérior, Siénsia no Kultura, Longuinhos dos Santos, ne’ebé sei hola fatin iha salaun konférensia UNITAL, Becora.

“Ami informa ona iha oportunidade antérior, no oras ne’e daudaun ami prepara no finaliza hela relatóriu auto avaliasaun ba kursu la’ós de’it 22 maibé sa’e tiha ba 24 inklui maestradu ha’at, lisensiatura 19, no baixarelatu ida (1) ne’ebé oras ne’e dauudaun iha faze finál ona. Kursu ualu ramata ona sira-nia relatóriu no aban Ministru sei integra simbólikamente relatóriu ualu ba ita-nia avaliadór nasionál sira hodi hahú ona prosesu avaliasaun,” Edmundu Viegas da Silva hateten ba Agência Tatoli, iha nia knaar fatin, INFORDEPE, Balide, Dili, kinta ne’e.

Prosesu avaliasaun ne’e konsiste iha parte rua, iha parte dahuluk mak avaliadór nasionál sira sei avalia dokumentu bazea ba relatóriu auto-avaliasaun ne’ebé departamentu sira hatama mai ANAAA hamutuk ho aneksu hotu-hotu. Avaliadór sira sei estuda no sei verifika ninia aneksu sira-ne’e no iha faze ikus hosi avaliasaun dokument ne’e, avaliadór sira sei fó sira-nia pontuasaun ba akreditasaun kursu nian.

“Ami uza idikadór 108, hosi standar 10. Hosi faze avaliasaun dokumetu hotu tiha, iha segundu faze mak ami sei halo fali kalendáriu vizita ba universidade sira liu-liu ba departamentu sira ne’ebé 24 ne’e, ami sei vizita sira ida-idak. ANAAA nia vizita ne’e reprezenta hosi painel avaliadór na’in tolu (3), orsida avaliadór nasionál na’in-rua mak sei vizita prezensiál no avaliadór na’in-ida internasionál sei la mai, maibé nia sei akompaña prosesu vizita ne’e liuhosi plataforma virtuál,” nia informa.

Periodu avaliasaun ne’e ANAAA hahú iha aban halo lansamentu to’o iha fulan-setembru nia rohan, no hosi setembru to’o fali novembru nia rohan ne’e hahú fali halo avaliasaun ba instituisaun ualu ne’e.

Iha avaliasaun ne’e, ANAAA la’os atu halo avaliasaun no akreditasaun hotu kedas ba iha kursu 24 ne’e, maibé ANAAA halo uluk ba kursu ualu ne’ebé prepara ona hanesan iha mestradu tolu hosi Universidade da Paz (UNPAZ) mak Saúde Públika, Direitu ho Administrasaun Públika. No UNDIL nian mak enfarmajen, no ba Universidade Oriental Timor Lorosa’e (UNITAL) nian mak Saúde Públika, enfarmajen no Administrasaun Públika, enkuantu husi Institute of Tecnology (DIT) mak MBA nian.

Antes ne’e, atividade prinsipál ANAAA nian mak hahú prepara kedas iha fulan janeiru hodi estabelese kontaktu ho ANAAA nia parseiru sira hanesan magnífiku reitór sira, liu-liu sira ne’ebé nia instituisaun no sira-nia kursu, sei sai alvu ba avaliasaun no akreditasaun akademika ba tinan 2021.

Kona-bá rekezitu ba avaliasaun no akreditasaun, nia informa, ANAAA iha formatu ida-ne’ebé mak koopera ho universidade sira, liu-liu iha nível departamentu sira no xefe departamentu ho dosente sira iha departamentu ne’e, sira tenke prenxe formatu ne’e.

ANAAA uza padraun 10 hodi halo avaliasaun ba ensinu superiór sira nune’e bele hetan akreditasaun.

Dahuluk ko’alia kona-ba vizaun, misaun, metas, objetivu no estratejia.

Daruak, kona-ba governansaun, lideransa, sistema garantia kualidade iha indikadór hamutuk tolu.

Datoluk, ko’alia kona-ba kuríkulu, esperiénsia ensinu aprendizazen, no kultura akadémika iha indikadór 26, indikadór ne’e maka nia pezo bo’ot liu.

Dahaat, rezultadu aprendizazen iha indikadór rua. Padraun dalima,  espesifikasaun estrutura no kontiudu programa nian iha indikadór rua.

Daneen, kona-ba estudante no graduadu sira, prosesu rejistu ba estudante foun, prosesu aprendizazen durante tinan haat ka lima to’o hetan graduasaun, no notas husi kada estudante graduadu sira hahú husi valór kiik to’o boot ho indikadór hamutuk 16.

Iha padraun dahitu,kona-ba rekursu umanu,  liga ho dosente sira ho ninia  indikadór hamutuk 22.

Padraun, daualu, kona-ba fasilidades, finansa, infraestruturas no sistema informasaun ho indikadór 16.

Padraun dasia,  ANAAA husu kona-ba peskiza servisu komunitária no kooperasaun iha indikadór 11. No ikus liu maka efeitu kona-ba satisfasaun husi parseiru sira-nian.

“Padraun 10 ne’e ho indikadór hamutuk 108, ida ne’e mak departamentu sira tenke hakerek relatóriu kona-ba asuntu sira ne’e, nune’e ami-nia avaliadór uza relatóriu ba faze analiza dokumentu hanesan sira lee, no priense pontuasaun depois ida ne’e maka sira ba vizita iha instituisaun ba kursu sira nee,” nia dehan.

Nia relata daudaun ne’e ANAAA iha hela prosesu avaliasaun ba kursu hamutuk 24 husi ensinu superiór sira hodi hetan akreditasaun.

Husi Universidade da Paz (UNPAZ), maka mestradu  iha área diretu, saúde públika, administrasaun públika, no lisensiatura (S1) iha área enjenaria sivíl.

Universidade Orientál Timor Lorosa’e (UNITAL), lisensiatura (S1)  iha área diretu, saúde públika, enfermajen, administrasaun públika, relasaun internasionál, agro-floresta, no peskas.

Universidade Dili (UNDIL), lisensiatura (S1) maka saúde públika, dentária, enfermajen, enjenaria petróliu.

Universidade Superiór Cristal (ISC), lisensiatura (S1) iha área enfermajen, no mós baxarelatu iha área parteira.

UNTL, lisensiatura no baxarelatu iha área  nutrisaun, farmasia, komunikasaun sosiál, lian Tetum, edukasaun fizika no desportu.

Institute of Business (IOB), lisensiatura iha área kontabilidade, komputadór. No área mba hosiInstitute of Tecnology (DIT).

“Iha kursu 24 ne’e, kursu 23 mak foin avalia ba dahuluk nian, no kursu edukasaun fizika no desportu UNTL nian mak re-akredita ba dala rua nian,” nia hateten.

Jornalista : Nelia Fernandes

Editór       :Cancio Ximenes

HAKEREK NO HATÁN

Please enter your comment!
Please enter your name here