VIQUEQUE, 23 jullu 2021 (TATOLI)—Estudante na’in-ualu hosi eskola Ensinu Sekundáriu Jerál (ESJ) Liceu no Ensinu Sekundáriu Katólika Canosa Ossu, rejistadu pozitivu COVID-19.
Estudante hirak-ne’e rejistadu pozitivu, bainhira hala’o teste swab masal ba eskola rua ne’e, iha inísiu reativasaun ensinu aprendizazen prezensiál iha 19 jullu 2021.
Notísia relevante:CCM Viqueque deside re-ativa ensinu aprendizazen prezensiál
Diretór Serbisu Saúde Munisípiu Viqueque, Francisco de Carvalho, esplika informasaun ikus iha 19 jullu kazu pozitivu COVID-19, estudante hosi eskola Liceu na’in-tolu no Canosa na’in-lima, ekipa saúde kontinua buka-tuir kontaktu besik hosi pasiente pozitivu ne’ebé mai hosi eskola rua ne’e.
“Kazu pozitivu hirak-ne’e ita detekta tanba, antes tama aula, ita halo teste masal. Sira-ne’e ami hatama hotu ona ba izolamentu Viqueque,” Francisco de Carvalho, hateten ba jornalista Agência Tatoli, iha munisípiu Viqueque, tersa (20/07).
Nia apela ba estudante-sira ne’ebé halo kontaktu besik ho pasiente pozitivu hirak-ne’e atu koopera ho parte saúde hodi halo teste swab, tanba estudante balun la koopera.
Iha fatin seluk Diretór Edukasaun Munisípiu Viqueque, Emidio Amaral, argumenta ekipa saúde nafatin buka-tuir kontaktu sira iha eskola no bainhira rezultadu teste swab pozitivu tenke hatama ba izolamentu.
Jornalista: Vitorino Lopes da Costa
Editór: Cipriano Colo