ESJ 01 Uatulari, Munisípiu Viqueque. Imajen Tatoli/Vitorino Lopes da Costa.

VIQUEQUE, 09 jullu 2021 (TATOLI)—Konsellu Konsultivu Munisípál (CCM sígla portugés) Viqueque, liuhosi sorumutu estra-ordináriu, deside hodi reativa ensinu aprendizazen prezensiál, bazeia ba desizaun Ministériu Edukasaun Juventude no Desportu (MEJD).

Prezidente CCM, Adiministradór  munisípiu Viqueque, Januário Soares, hateten desde fulan marsu to’o ohin loron,  prosesu aprendizazen iha munisípiu ne’e paradu tanba implementasaun Estadu emerjénsia no serka sanitária inklui konfinamentu domisiliáriu.

Notísia relevante:19 jullu, MEJD re-ativa ensinu aprendizajen prejensiál

“Maski membru CCM la kompletu hodi halo votasaun atu deside reativa prosesu aprendizazen, maibé ita iha ona oportunidade hosi  MEJD ne’ebé foti ona desizaun atu reativa eskola, nune’e munisípiu ne’e mós sei reativa duni,” Januário Soares hateten iha meza assembleia CCM,  iha salaun Administrasaun Viqueque, sesta ne’e.

Administradór ne’e husu ba administradór postu-sira atu fó autorizasaun ba eskola sira hodi re-ativa  prosesu apredizazén, inklui apela ba xefe suku no xefe aldeia-sira atu koopera ho parte serbisu saúde munisipál hodi pratika nafatin prevensaun COVID-19.

Iha fatin hanesan Diretór Serbisu Edukasuan Munisípiu Viqueque, Emídio Amaral, hateten eskola-sira preparadu atu reativa atividade aprendizazen, tanba parte serbisu edukasaun distribui ona mascara, monta ona tanki bee no husu de’it atu kumpri prevensaun COVID-19.

“Ohin ita-nia CCM fó ona kbiit atu re-ativa eskolá-sira iha munisípiu Viqueque. Iha segunda 12 jullu, eskola sira hahú halo preparasaun, kada eskola hala’o limpeza jerál  atu bele hahú iha 19 jullu,” Emídio Amaral, haktuir.

CCM Viqueque ne’e kompostu hosi Prezidente atuál administradór munisípiu Viqueque, Januário Soares ‘Bolly’ , membru sira kompostu hosi, xefe suku husi suku 36, lia-nain hosi suku, veteranu, joventude, reliziozu, diretór no xefe departamentu-sira iha munisípiu Viqueque.

Entretantu, MEJD iha 08 jullu fó-sai ona data fiksu bá prosesu ensinu aprendizazen prejensiál ne’ebé sei hahú iha loron 19 jullu, tinan ne’e.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here