Jornalista Agência TATOLI, Natalino Costa, halo entrevista ho Sekretariadu tékniku programa distribuisaun Cesta Bázika hosi MAP, Lorenço Fontes Borges, iha edifísiu Comoro, kinta (22/07). Imajen/MAP

DILI, 22 jullu 2021 (TATOLI)—Sekretariadu  tékniku  programa distribuisaun Cesta Bázika, hosi Ministériu Agrikultura no Peska (MAP), Lorenço Fontes Borges, informa, hanesan ministériu implementadór kontrata empreza hamutuk 40 hodi sosa no distribui produtu.

“Hahú fulan-dezembru 2020, MAP simu alokasaun orsamentu $5.780.100 ba implementasaun programa, hodi sosa produtu agríkola no fahe iha suku 47 munisípiu Bobonaro, ba benefisiáriu hamutuk 106.782,” Sekretariadu  tékniku  programa informa ba Agência TATOLI, iha ninia knaar fatin, edifísiu MAP, Comoro, kinta ne’e.

Hosi empreza ne’ebé partisipa iha programa hosi parte MAP, 16 hetan ona pagamentu ho totál millaun $2,7, enkuantu empreza 24 seluk tama pagamentu faze daruak, ne’ebé dokumentu hotu submete ona ba parte Ministériu Finansa (MF).

Notísia relevante: MF halo ona pagamentu Cesta Bázika ba kompañia lokál 102

Distribuisaun Cesta Bázika iha Bobonaro hahú iha fulan-novembru 2020 no finaliza iha abríl 2021.

Durante prosesu distribuisaun, MAP rejista reklamante hamutuk 2.500 resin ne’ebé ministériu responsável sei rezolve.

“Ami sei esforsu hosi sosa sasán filafali, nune’e bele fahe ba ita-nia reklamante sira hodi bele hetan sira-nia direitu,” nia akresenta.

Bazeia ba dekretu-lei númeru 48/2020, 07 outubru, kona-ba medida apoiu família, atribuisaun Cesta Bázika, operadór ekonómika lokál iha ámbitu planu rekuperasaun ekonómika no kria rejime espesiál aprovizionamentu ba efeitu, iha artigu 10 kona-ba modalidade aprovizionamentu, hatuur katak aprovizionametu akizisaun produtu realiza bazeia ba modalidade ajudikasaun direta to’o limite verba ne’ebé aloka ba entidade ajudikante ne’ebé ministériu indika ona.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu hosi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina-nuu, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here