Primeiru-Ministru, Taur Matan Ruak. Imajen TATOLI/Egas Cristóvão.

DILI, 22 jullu 2021 (TATOLI)—Primeiru-Ministru, Taur Matan Ruak, hateten Governu preokupa variante foun Delta COVID-19, tanba espalla ona iha nasaun viziñu Indonézia liu-liu iha Kupang-Atambua.

Notísia Relativu: Xefe Estadu preokupa ho variante Delta COVID-19

“Ita Preokupa tanba evolusaun variante foun Delta iha ita-nia viziñu sira iha Indonézia liu-liu Kupang-Atambua mós iha ona. Alende ne’e, Australia mós iha ona,” Primeiru-Ministru hateten ba jornalista sira hafoin hasoru malu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, kinta ne’e.

Nia dehan, Prezidente Repúblika husu atu Governu kontinua fó atensaun nafatin ba sidadaun sira atu prevenidu tuir regra sanitária hosi Organizasaun Mundiál ba Saúde (OMS) no Ministériu Saúde (MS), atu kontinua hases-an hosi virus ne’e.

“Iha dalan atu prevene ne’e mak tenke vasina, nune’e ema ida-idak bele proteje-an,” nia dehan.

Maske variante Delta-COVID-19 ne’e besik ona Timor-Leste maibé Xefe Estadu enkoraja katak enkuantu vasina la’o di’ak hela tanba to’o agora Timor-Leste simu vasina hamutuk 460.000-resin ne’ebé uza tiha ona 300.000-resin, no espera katak iha tempu badak ne’e bele uza hotu.

“Ita mós prevene atu simu vasina no kontinua fó vasina nafatin ba ita-nia sidadaun sira. Ministériu Saúde ho Komisaun Ministeriál fó prióridade liu-liu ba Dili, Bobonaro, Covalima no mós Oé-Cusse, liu-liu sira-ne’ebé iha fronteira atu proteje uluk sira, antes proteje ita-sira ne’ebé laran ne’e,” nia dehan.

Iha sorumutu ne’e, Prezidente Repúblika, Francisco Guterres Lú Olo, husu ba Governu atu kontrola fronteira ho rigorozu, no daudaun ne’e Governu taka fronteira no sasán de’it mak tama Timor-Leste.

“Xefe Estadu husu atu ita hotu-hotu la’o ho máskara no medida sanitaria. Maibé, ha’u haree motorizada balun komesa la tau ona máskara. Ita husik livre uitoan, sira komesa la kumpre. Ha’u espera katak hotu-hotu bele konsidera kuidadu-an atu labele hetan moras ne’e no labale da’et fali ba família sira,” Taur Matan Ruak hateten.

Xefe Governu apela ba sidadaun sira atu labele fiar informasaun falsa no labele tau buat falsu sira iha ulun hodi hanoin.

Entretantu Komandante Jerál Polísia Nasionál Timor-Leste (PNTL), Komisáriu Faustino da Costa hateten, durante Estadu Emerjénsia no serka sanitaria ne’e sidadaun balun tenta nafatin halo atividade ilegál sira hodi ultrapasa fronteira ho ilegalmente.

Nia infroma, bainhira PNTL detein ema hirak ne’e tenke kumpre regra Estadu emérjensia nian hodi submete ba kuarentena no bainhira sira sai no livre ona mak kontinua prosesu investigasaun.

Komisáriu Faustino hateten, PNTL detein ona ema na’in-sia no mós autoridade seguransa deporta ne’e hamutuk na’in-14 iha semana rua nia laran ne’e.

PNTL kontinua halo seguransa iha fronteira tanba variante foun Delta COVID-19 ameasa daudaun mai Timor-Leste, entaun PNTL kontinua koopera ho entidade lokál liu-liu lideransa komunitáriu sira no parte hotu-hotu atu asegura ida-ne’e no parte polísia mak sei la tolera kona-ba aktu ilegál.

“Virus ne’e, ita rona katak iha rai ketan sorin ne’e iha ona entaun saida mak ita hakarak. Se ita lakohi buat ne’e to’o iha nia-rain ne’e, buat sira illegal, tantu ema ka hola sasán sira ilegál ne’e tenke hapara tanba polísia sei la tolera ida-ne’e akontese,” nia dehan.

Notísia Relevante: COVID-19, rekoperadu 50 no ativu 739

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here