DILI, 22 jullu 2021 (TATOLI)-–Prezidente Kámara Komérsiu Indústria Timor-Leste (CCI-TL, sigla portugés), Oscar Lima, rekomenda ba Governu atu tau prioridade maka’as iha setór infraestrutura no produtivu atu muda povu nia moris.
“Ha’u-nia hanoin atu investe agora iha setór infraestrutura, nune’e emprezáriu sira bele envolve hodi fó kontribuisaun ba kampu traballu hodi fó serbisu ba komunidade,” Prezidente CCI-TL hateten iha edifísiu Acait, kinta ne’e.
Aleinde ne’e, rekomenda mós atu fó prioridade ba setór produtivu sira hanesan agrikultura, turizmu, pekuária no peska atubele fó impaktu pozitivu ba populasaun nia moris.
Nia konsidera área rua ne’e importante tanba bele fó serbisu ba komunidade no haree ba partisipasaun emprezáriu hodi bele sirkula osan ba komunidade nia le’et.
CCI-TL nota mós katak durante ne’e investimentu iha setór produtivu menus iha kada tinan.
“Ami nota ema barak mak sai dezempregu tanba situasaun impase polítika hahú kedan 2017 to’o 2020 no tinan ne’e iha pandemia ne’ebé ninia impaktu boot tebes ba ekonomia no kampu traballu,” nia akresenta.
Tanba ne’e, atu hamenus dezempregu, emprezáriu timor-oan ne’e sujere ba Governu implementa projetu sira iha setór rua atu benefisia povu, lori produtu sira ba merkadu hodi hetan rendimentu.
Entretantu, Governu liuhosi Konsellu Ministru (KM) aprova ona tetu agregadu no dezagregadu OJE ba tinan fiskál 2022 ho montante biliaun $1,571.
Notísia relevante: Governu aprova tetu agregadu OJE 2022 biliaun $1,5
Governu mós define ona prioridade nasionál neen ba orsamentu tinan oin mak; dezenvolvimentu kapitál umanu hanesan edukasaun, formasaun profisionál no saúde, abitasaun no inkluzasaun sosiál, setór produtivu hanesan agrikultura no turizmu, ambiente no konetividade, dezenvolvimentu setór privadu, dezenvolvimentu rurál no boa governasaun.
Nune’e mós, Ministériu Finansa loke ona sesaun traballu hodi distribui pakote fiskál ba kada instituisaun Estadu sira, hafoin prosede ba Komisaun Revizaun Orsamentu Polítiku (KROP) hodi elabora proposta no submete ba Parlamentu Nasionál iha loron 01 outubru 2021 tuir espíritu iha Lei Enkuadramentu Orsamentu.
Jornalista : Florêncio Miranda Ximenes
Editora : Julia Chatarina
