Komadante Bombeiru Munisípiu Viqueque, Vitorino Duarte Ribeiro, antrega apoiu emerjénsia ba vítima inséndiu iha suku Uma Wa’in Leten, kuarta (21/07/21). Imajen Tatoli/ Vitorino Lopes da Costa.

VIQUEQUE, 21 jullu 2021 (TATOLI)—Sekretáriu Estadu Protesaun Sivíl (SEPS), liuhosi ekipa protesaun sivíl munisípiu Viqueque, komisaun jestaun risku dezastre, oferese ona apoiu emerjénsia ba vítima dezastre naturál hamutuk uma-ka’in rua iha suku Uma Wa’in Leten, postu administrativu Viqueque Vila.

Komadante Bombeiru Munisípiu Viqueque, Vitorino Duarte Ribeiro, esplika uma ida anin sobu no aat totál, no uma ida seluk ahi han mutuk.

Notísia relevante:Vítima inséndiu iha Viqueque simu ona apoiu emerjénsia

“Kona-bá materiál konstrusaun, parte protesaun sivil Viqueque sei submete pedidu ba nasionál atu vítima-sira bele hetan,” Vitorino Duarte Ribeiro hateten iha suku Uma-Wa’in Leten, kuarta ne’e.

Vítima Helena Soares ne’ebé nu’udár faluk ho oan na’in-hitu agradese ba Governu tanba oferese ona apoiu emerjénsia maski sasán konstrusaun seidauk fó.

Nune’e mós vítima inséndiu Venâncio Soares, haktuir katak, dezastre ne’e akontese iha kalan boot 06 jullu 2021, bainhira ema hotu toba dukur, nune’e sasán uma laran, la salva.

Agora dadaun Venâncio Soares  ho nia-kaben no oan na’in-lima toba iha uma toos tanba laiha hela fatin.

Protesaun sivíl Viqueque distribui ona nesesidade emerjénsia ba vítima sira hanesan, mina bimoli, foos, supermie, biskuat, balde, sanan, bikan, kanuru no lona atu halo tenda provizóriu.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here