Inséndiu ne’ebé akontese iha aldeia Manehat, suku Caraubalo, postu administrativu Viqueque Villa, Munisípiu Viqueque, sesta (16/07). Imajen Tatoli/Vitorino Lopes da Costa.

VIQUEQUE, 19 jullu 2021 (TATOLI)—Vítima inséndiu iha aldeia Manehat, suku Caraubalo, postu administrativu Viqueque Villa, Munisípiu Viqueque, hetan ona apoiu emerjénsia hosi Sekretáriu Estadu Protesaun Sivíl (SEPS).

Komandante Bombeiru Munisípiu Viqueque, Vitorino Duarte Ribeiro, hateten ahi han uma ne’e iha sesta (16/07) tuku 15:00 otl, no parte Protesaun Sivíl munisípiu Viqueque entrega ona nesesidade emerjénsia ba vítima.

Notísia relevante:Inséndiu iha Uailili, uma-lisan tolu no uma rua afetadu

Nia esplika, akontesimentu ne’e ho kategoria uma hetan estragu totál, tanba sasán uma laran la salva hotu.

“Inséndiu ne’ebé akontese iha Viqueque ne’e ami rekolla kedan dadus, liuliu sasán uma laran la salva no bombeiru ba rega duni, maibé la konsege salva sasán,” Vitorino Duarte Ribeiro, hateten ba jornalista Agência Tatoli, iha munisípiu Viqueque, segunda ne’e.

Iha fatin hanesan, vítima José Paulo, hateten inséndiu ne’e akontese tanba sirkuitu eletrisidade bainhira vítima ho nia kaben sai hela.

“Ha’u ho ha’u-nia kaben sai hela no labarik-sira de’it mak hela iha uma. Nune’e bainhira ahi han uma la salva sasán hanesan roupa, hahán, televizaun, jelera no labtop ida,” nia esplika.

Sasán emerjénsia ne’ebé parte Protesaun Sivíl apoia ona ba vítima  mak hanesan, balde kiik, sanan, taxu, bikan, kanuru, mina bimoli, foos,  supermie, biskuit.

Kona-bá materiál konstrusaun seidauk distribui ba vítima, tanba parte protesaun sivíl sei aprezenta uluk dadus ba nasionál.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here