Rama Ambon Imajen/Agapito dos Santos.

DILI, 21 jullu 2021 (TATOLI)—Tribunál Distritál Dili (TDD), hala’o primeiru interrogatóriu ba arguidu ho inisiál IF, ne’ebé deskonfia komete krime arma branka ka lori rama ambon.

Tuir faktu, iha indísiu katak, arguidu lori rama ambon atu buka-tuir suspeitu ida nu’udár kondutór ne’ebé antes ne’e halo problema ho arguidu nia-maun.

Notísia relevante:TDD julga kazu arma branka

Iha loron 18 jullu 2021, arguidu komesa buka suspeitu hodi halo pasa revista ka’er ho rama ambon  ba karreta ida iha munisípiu Liquiça, maibé momentu ne’e karreta ne’ebé arguidu pasa revista ba la’ós suspeitu ne’e, maibé membru polísia mak iha laran nune’e polísia halo kedan  flagrante delitu direta tanba lori rama ambon.

Ministériu Públiku (MP), akuza arguidu ho krime arma branka lei númeru 5/2017 ne’ebé define iha artigu 2 númeru 1, ko’alia kona-bá  katana, espada, rama ambon no seluk tan kompletamente kriminál liu ho pena durante tinan haat to’o ualu.

Liu hosi primeiru interrogatóriu ne’e, Tribunál aplika medida aprezentasaun periódika ba arguidu, tanba faktu hatudu iha duni objeitu apreensaun ba rama ambon, hosi autoridade seguransa.

Kada fulan, arguidu tenke aprezenta-an iha eskuadra polísia ne’ebé besik, hodi fasilita liu-tán MP, hodi rekolla prova-sira bele aprezenta iha Tribunál iha julgamentu normál tuir-mai.

Primeiru interrogatóriu ne’e, prezide hosi juiz turnu  José Gonçalves, MP reprezenta hosi prokuradór Nelson Martins no arguidu hetan asisténsia legál hosi Defensór Públiku, Marçal Mascarinhas.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here