TDD. Imajen Tatoli /Dok

DILI, 15 jullu 2021 (TATOLI)—Tribunál Distritál Dili (TDD), hala’o prosesu julgamentu koletivu hasoru arguidu ADS tanba deskonfia komete krime arma branka iha 2019.

Tuir faktu akuzasaun hosi Ministériu Públiku (MP), ne’ebé Tribunál lee-sai katak, iha 20 outobru 2019, tuku 14:00 otl, lezada GSS hili ai-maran iha sira nia-kintál.

Notísia relevante:TDD aplika pena suspensaun ba arguidu na’in-sanulu iha MCIA

Derrepente haree arguidu ho katana duni lezada atu taa, lezada hakfodak hodi halai sa’e rai-lolon konsekuénsia lezada monu to’o ain kanek.

Nune’e, MP akuza arguidu ho krime arma branka lei númeru 5/2017 ne’ebé define iha artigu 2 númeru 1 ko’alia kona-bá  katana, espada no seluk tan, rama ambon kompletamente kriminál liu ho pena durante tinan haat to’o ualu.

Liuhosi audénsia, arguidu hatán ba akuzasaun sira-ne’e  laloos hotu, tanba momentu ne’e hadau katana hosi lezada nia-inan nia liman.

Tanba, bainhira arguido-sira iha uma hela, lezada ho nia-inan mak ba uma taa uluk arguidu sira-nia uma odamatan ho katana.

Fatin hanesan, lezada GSS hateten arguidu mak ho katana duni-tuir nia atu taa.

Hafoin rona parte sira, Tribunál adia fila-fali julgamentu ne’e ba loron seluk hodi halo alegasaun finál.

Audiénsia ne’e prezide hosi juiz koletivu Ivan Antonino, Ana Paula Fonseca, Maria Solana, MP reprezenta hosi prokuradór Reinato Bere Nahac, no arguidu hetan asisténsia defeza hosi advogadu privadu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here