Pesoál Saúde pepara vasina AstraZeneca, iha postu administrativu Don Aleixo, suku Bairro Pité, kuarta (21/07). Imajen TATOLI/Francisco Sony

DILI, 21 jullu 2021 (TATOLI)Ministru Finansa (MF), Rui Augusto Gomes, aprezenta hikas iha reuniaun Konsellu Ministru (KM), Projetu Dekretu-Lei kona-ba kriasaun apoiu finanseiru ba kazu mate ka inkapasidade ne’ebé bele akontese tanba vasina kontra COVID-19.

Tuir Ministru Prezidénsia Konsellu Ministru, Fidelis Manuel Leite Magalhães, maski risku efeitu sekundáriu grave hosi vasina kontra COVID-19 kiik tebes, maibé Governu deside fó kompensasaun vasina ba kualker populasaun bainhira mosu kazu ruma.

“Inisiativa lejizlativa ne’e ho objetivu atu prevene situasaun exesionál, ne’ebé ninia efeitu sekundáriu sira grave liu no ho hanoin atu prevee kompensasaun tenke fó ba ema ne’ebé hetan efeitu sekundáriu hirak ne’e,” Ministru dehan hafoin reuniaun ezekutivu, iha Palásiu Governu, kuarta ne’e.

Projetu Dekretu-Lei ne’e, hetan ona deliberasaun iha reuniaun KM iha loron 23 juñu tinan 2021, maibé tanba iha faze redasaun finál introdús alterasaun balun, maka presiza submete filafali hodi hetan deliberasaun foun.

Notísia relevante: Governu sei kompensa kazu inkapasidade no mate rezulta hosi vasina

Dekretu-Lei ne’e define katak iha kazu inkapasidade kiik liu 30% ne’ebé provoka hosi vasina kontra COVID-19 sei simu kompensasaun ho valór $1.000, karik inkapasidade entre 30% to’o 70%, sei simu $2.100 no iha kazu vasina provoka inkapasidade boot liu 70% sei simu 7.000.

Enkuantu, bainhira iha kazu mate ne’ebé bele akontese tanba simu vasina, sei simu kompensasaun ho valór $10.000.

Molok fó kompensasaun sei halo verifikasaun ba situasaun inkapasidade ka mate, no identifika karik iha relasaun ho vasina kontra COVID-19 no sei halo avaliasaun médika, ne’ebé Ministériu Saúde (MS) maka responsável ba direitu apoiu.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here