Pesoál Saúde prepara hela vasina AstraZeneca. Imajen TATOLI/Francisco Sony

DILI, 23 juñu 2021 (TATOLI)–Ministru Finansa, Rui Augusto Gomes, aprezenta iha reuniaun Konsellu Ministru (KM), Projetu Dekretu-Lei, kona-ba kriasaun kompensasaun ba eventualidade inkapasidade no mate, ne’ebé rezulta hosi inokulasaun vasina kontra COVID-19.

Tuir Ministru Prezidénsia Konsellu Ministru, Fidelis Manuel Leite Magalhães, maski risku efeitu sekundáriu grave hosi vasina kontra COVID-19 kiik tebes, maibé iha kompensa tanba benefísiu vasinasaun ne’e ba populasaun ein jerál.

“Inisiativa lejizlativa ne’e ho objetivu atu prevene situasaun ne’ebé ninia efeitu sekundáriu grave liu no atu prevee devida kompensasaun ba ema iha efeitu sekundáriu,” Ministru Prezidénsia Konsellu Ministru, relata hafoin reuniaun ezekutivu iha Palásiu Governu, kuarta ne’e.

Dekretu-Lei ne’e define katak bainhira iha kazu inkapasidade inferiór 30% provoka hosi vasina kontra COVID-19, sei fó kompensasaun ho valór $1.000, karik inkapasidade entre 30% to’o 70% sei atribui valór $2.100 no iha kazu vasina provoka inkapasidade boot liu 70% sei atribui $7.000.

Enkuantu, iha kazu eventualidade mate rezulta hosi inokulasaun vasina sei atribui kompensasaun ho valór $10.000.

Jornalista : Antónia Gusmão

Editora     : Julia Chatarina

 

HAKEREK NO HATÁN

Please enter your comment!
Please enter your name here