Komisaun F halo konsultasaun públika ho entidade relevante iha Pouzada, Villa antiga, kuarta (21/07). Imajen TATOLI/Natalino Belo

BAUCAU, 21 jullu 2021 (TATOLI)—Parlamentu Nasionál (PN) liuhosi Komisaun F ne’ebé trata asuntu Saúde, Seguransa Sosiál no Igualdade Jéneru, halo konsultasaun públika ho entidade relevante iha munisípiu Baucau, kona-ba projetu lei nú. 29/V/(3ª) protesaun labarik no joven iha perigu.

Prezidente Komisaun F, Deputadu Noé da Silva Ximenes ‘Buka Tuir’, hateten, objetivu atividade ne’e hodi halibur ideia no rekomendasaun hosi entidade sira molok tama diskusaun jeneralidade no espesialidade.

“Sira iha proposta balun ne’ebé hato’o mai Komisaun F, hanesan definisaun títulu lei tenki halo didi’ak inklui idade, atu kontempla iha lei tenki serta ho situasaun reál Timor-Leste,” Prezidente Komisaun F informa iha Pouzada, Villa antiga, kuarta ne’e.

Notísia relevante: Komisaun F realiza audiénsia públika kona-ba projetu-lei protesaun labarik-joven iha perigu

Tuir Deputadu Noé, iha posibilidade projeitu lei ne’e sei aumenta artigu tanba presiza defini klaru idade labarik nian inklui defini klaru hosi parte família tanba daudaun deskreve jerál liu.

Prezidente komisaun konsidera, atu rezolve kestaun risku hirak ne’e iha komunidade, liuliu labarik no joven sira, presiza konsensioliza sidadaun liuhosi divulgasaun informasaun to’o baze.

“Presiza divulga informasaun hodi inan-aman sira hatene dever oinsá no oan sira mós hatene dever no direitu,” nia akresenta.

Konsultasaun projetu lei ne’e partisipa hosi Servisu Saúde no Servisu Edukasaun munisipál, Autoridade Administrasaun munisípiu, Polísia Nasionál Timor-Leste (PNTL) no konviksaun relijiosa hanesan Padre, Madre inklui Bispu Dioseze Baucau, Don Basílio do Nascimento.

Tuir planu, iha loron 27 jullu, Komisaun F sei hato’o rezultadu ba meza PN hodi tau ba ajenda hosi diskute iha plenária.

Lejizlasaun ne’ebé akumula artigu hamutuk 103 ho kapítulu IX ne’e, sei sai hanesan instrumentu legál save hodi proteje labarik no joven timor-oan hotu hosi violénsia, esploitasaun, abuzu, no asegura sira-nia moris di’ak.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here